Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 337 Hüküm no: 316 Orijinal metin no: [44b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslı Beşe b. Süleyman’ın merhum Ali Çelebi b. Mehmed’in amcası ve varisi olduğunu diğer vereseler huzurunda şahitlerle ispat ettiği Vilâyet-i Rumeli’nde Ohri sancağında Akçahisar kasabası sükkânından işbu bâ‘isü’r-rakīm Muslı Beşe b. Süleyman nâm kimesne meclis-i şer‘-i hatîr-i lâzimü’t-tevkīrde mahmiye-i İstanbul’da Arabacı Bayezid mahallesinde sâkin iken bundan akdem vefât eden Ali Çelebi b. Mehmed Ağa’nın li-ebeveyn kız karındaşları Fâtıma ve Âişe nâm sagīrlerin tesviye-i umûrlarına kıbel-i şerî‘at-i mergūbeden mansûb vasîleri ve muhallefât-ı müteveffâ-yı mezbûra vâzı‘u’l-yed olan Ali Ağa b. Mehmed mahzarında üzerine da‘vâ ve takrîr-i kelâm edip ben müteveffâ-yı mezbûr Ali Çelebi’nin [45a] li-ebeveyn ammisi ve usûbet-i nesebiyye cihetinden vârisi olup zîrâ müteveffâ-yı mezbûr Ali Çelebi’nin babası mezbûr Mehmed Ağa benimle li-ebeveyn karındaşları olup babamız ismi mezbûr Süleyman ve anamız ismi Sitti bt. Tatar Memi nâm hâtun ile maskat-ı re’simiz zikrolunan Akçahisar kasabası olup müteveffâ-yı mezbûrun verâseti li-ebeveyn kız karındaşları sagīretân-ı mezbûretân cedde-i sahîhası Belkıs bt. Abdullah nâm hâtuna ve li-ebeveyn ammisi olduğum ecilden bana münhasıra bizden gayrı vâris-i ma‘rûfu ve terekesine âhar müstahık yoğiken mezbûr Ali Ağa mecmû‘-ı muhallefât-ı müteveffâ-yı mezbûra vaz‘-ı yed edip hisse-i şer‘iyyemi edâdan imtinâ‘ eder suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup zikrolunan Akçahisar kasabasında Zeytunluk mahallesinde sâkin Murtaza Ağa b. Abbas ve Ali Ağa b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-hakīka müdde‘î-i mezbûr Muslı müteveffâ-yı mezbûr Ali Çelebi’nin babası merkūm Mehmed Ağa ile li-ebeveyn karındaşları olup babaları mezbûr Süleyman ve anaları Sitti bt. Tatar Memi nâm hâtun ve maskat-ı re’sleri kasaba-i mezbûredir müteveffâ-yı mezbûrun verâseti li-ebeveyn kız karındaşları sagīretân-ı mezbûretân ile cedde-i sahîhası mezbûre Belkıs bt. Abdullah’a ve li-ebeveyn ammisi müdde‘î-i mezbûr Muslı’ya münhasıra olup bunlardan gayrı vâris-i ma‘rûfu ve terekesine âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâl li-sene seb‘a ve sittîn ve elf. Şühûdü’l-hâl: Hâfız Mehmed Ağa b. Hasan, Derviş Mehmed Efendi b. el-Hâc Mustafa, el-Hâc Ca‘fer b. Abdullah, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]