Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 338 Hüküm no: 317 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Hayatî bt. Abdullah’ın öldükten sonra vasiyetini yerine getirmek üzere Mahmud Çelebi b. Ahmed’i vasi tayin ettiği Mahmiye-i İstanbul’da Gül Câmi‘i kurbünde Molla Hüsrev mahallesinde sâkine Saraylı Hayatî Hâtun bt. Abdullah meclis-i şer‘-i hatîr-i lâzimü’t-tevkīrde vasiyet-i âti’l-beyânı tenfîze vasiyy-i muhtâr nasb ü ta‘yîn eylediği mahalle-i mezkûre ahâlîsinden Mahmud Çelebi b. Ahmed mahzarında bi-tav‘ihâ ikrâr ve i‘tirâf edip bi-emri’llâhi te‘âlâ kazâ-i nahb ve likā-i Rab ettiğimde silk-i mülkümde münselik emlâkimden yirmi miskāl bir tek altın bilezik ve zümrüd taşlı bir çift altın küpem yed-i vasî ile semen-i misillerine bey‘ olunup semenlerinden hâsıl olan meblağ techîz ve tekfînime ve ıskāt-ı salâtıma ve eyyâm-ı mu‘tâdede tabh-ı ta‘âmıma sarf olundukdan sonra yedimde mülk ve hakkım olan Mushaf-ı şerîfi ben hayâtda olduğumca kendim kırâat ve tilâvet edip vefâtımdan sonra işbu hâzır bi’l-meclis olan Yusuf Bey b. Abdullah kırâat ve tilâvet edip sevâbını rûhuma ihdâ eyleye vefâtından sonra mezbûr Yusuf Bey’in evlâdı ve evlâd-ı evlâdı zikrolunan Mushaf-ı şerîfi kırâat edip sevâbını rûhuma ihdâ edeler ve ba‘de inkırâzi’l-kül zikrolunan Mushaf-ı şerîf mahalle-i mezkûrede vâki‘ mescid-i şerîfde vaz‘ olunup kırâat ve tilâvete kādir kimesneler kırâat ve tilâvet edip sevâbını rûhuma hibe edeler ve yine silk-i mülkümde muntazam emlâkimden bir kazgan-ı kebîri ben hayatda olduğumca kendim isti‘mâl edem vefâtımdan sonra zikrolunan kazganı utekām ve evlâd-ı utekām ale’l-iştirâk tasarruf edeler ve ba‘de inkırâzi’l-evlâd zikrolunan kazganı mahalle-i mezbûre ahâlîsi isti‘mâl edeler deyu vasiyet edip ve vesâyâ-yı mezkûreyi tenfîze mezbûr Mahmud Çelebi’yi vasiyy-i muhtâr nasb ü ta‘yîn eyledim dedikde ol dahi vesâyet-i mezkûreyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Abbas Efendi el-imâm, Mustafa Çavuş b. Halil, Musa b. Veli, Mustafa b. Mahmud ve gayruhüm mine’l-[hâzırîn.]