Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 339 Hüküm no: 318 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Polihoroni’nin Çakır Ağa mahallesindeki mülk menzilini Yorgaki v. Yani’ye beş yüz elli guruşa sattığı Mahmiye-i İstanbul’da Lanka kurbünde Çakır Ağa mahallesinde Todori v. Polihoroni nâm zimmî meclis-i şer‘-i hatîr-i lâzimü’t-tevkīrde işbu râfi‘ü’l-kitâb Yorgaki v. Yani nâm zimmî mahzarında tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım olup mahalle-i mezkûrede vâki‘ bir tarafdan ( ) nâm ekmekçi Ermeni mülküne ve bir tarafdan Dülger Sava nâm zimmî mülküne ve bir tarafdan bazen Hasan Ağa ve bazen Aslan nâm zimmî mülklerine ve bir tarafdan Kuyumcu Yakomi zimmî mülküne müntehî olup tûlen on dört buçuk ve arzan sekiz zirâ‘ arsa üzerinde mebnî tabaka-i ulyâda iki bâb odayı ve bir tahta-pûşu ve tabaka-i vüstâda iki bâb odayı ve müşterek sokak kapısını ve müşterek demir kapılı mahzeni ve müşterek su kuyusunu ve kenîfe mürûr u ubûr için vaz‘ olunan iki müşterek nerdübânlı mülk menzilimi kâffe-i hukūk ve merâfıkıyla mezbûr Yorgaki’ye beş yüz elli riyâlî guruşa bey‘ ve teslîm edip ol dahi minvâl-i meşrûh üzere iştirâ ve tesellüm eylediğinden sonra semeni olan meblağ-ı mezkûr beş yüz elli riyâlî guruşu mezbûr Yorgaki yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr mezbûr Yorgaki’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olunsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fî gurreti Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Abdülaziz Efendi el-imâm, Derviş Çelebi el-müezzin, Mehmed Halîfe el-müezzin, Ömer Çelebi b. ( ) kapıcı, Mustafa Çelebi b. Mehmed, Osman Beşe çukadâr, Abdi Efendi imâm-ı Çakır Ağa ve gayruhüm mine’l-[hâzırîn.]