Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 344 Hüküm no: 327 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostanti v. Sürücü Yorgaki ve ortağı Paros v. Apostol’un balmumu alacakları olduğu iddiasıyla Tacir Yani v. Papa Mihal aleyhine açtıkları davada otuz beş guruş üzerine sulh oldukları Üç kâğıd aşağıda tekrar kayd olunmuşdur. Mahmiye-i İstanbul hısnı ebvâbından Fenerkapısı kurbünde Kiremid mahallesi sükkânından olan Kostanti v. Sürücü Yorgaki ve şerîki Paros v. Apostol nâm zimmîler taraflarından husûs-ı âti’z-zikri ikrâra vekîlleri olup vekâleti mahmiye-i mezbûrede Tahtaminare mahallesi sükkânından Mustafa Çavuş b. Hasan Çavuş ve Müezzin Mehmed Halîfe b. Abdullah şehâdetleri ile şer‘an sâbite olan Kostanti v. Yorgo nâm zimmî meclis-i şer‘-i hatîr-i lâzimü’t-tevkīrde Vilâyet-i Rumeli’nde Avlonya sancağında vâki‘ Boganya kazâsına tâbi‘ Mesarye nâm karye sükkânından olup tüccâr tâifesinden olan hâmilü hâze’l-kitâb Yani v. Papa Mihal nâm zimmî mahzarında bi’l-vekâle tav‘an ikrâr ve i‘tirâf edip müvekkillerim şerîkân-ı merkūmân sekiz sene mukaddem beynlerinde müşterek bin dört yüz riyâlî guruşluk ma‘lûmü’l-vezn külçe balmumlarını Eyüb kazâsına tâbi‘ Küçükköy nâm karyede sâkin iken hâlik olan Rusyo [v.] Dimo nâm zimmîye Eflak vilâyetinde teslîm etmek için merkūm Yani’ye def‘ ve teslîm edip mezbûr Yani dahi ahz u kabz edip lâkin mezbûr Rusyo’ya teslîm etmeyip yedinde kalmağla hâlâ zafer bulup zikrolunan balmumunun aynı mevcûd ise aynılarını değil ise yevm-i ahzında olan kıymetini merkūm Yani’den taleb ve da‘vâ ettiklerinde bi’l-külliyye inkâr edicek beynlerinde münâza‘ât-ı kesîre vâkı‘a olmuşidi el-hâletü hâzihî merkūm Yani ile müvekkillerim mezbûrânın beynlerine muslihûn tavassut edip müvekkillerim mezbûrân ile merkūm Yani’yı an-inkâr da‘vâ-yı mezkûreden otuz beş kıt‘a riyâlî guruş üzerine sulh eylediklerinde müvekkilân-ı mezbûrân dahi sulh-ı mezbûru kabûl ve bedel-i sulh olan meblağ-ı mezbûru meclis-i sulhda merkūm Yani yedinden tamâmen ahz u kabz edip zikrolunan bin dört yüz guruşluk balmumu da‘vâsından ve târih-i kitâba gelince hukūk-ı ma‘lûme ve mechûleden merkūm Yani’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediler min ba‘d müvekkillerim mezbûrân Kostanti ve Paros’un münkir-i merkūm Yani üzerinde husûs-ı mezbûra ve gayrı müte‘allik bi-vechin mine’l-vücûh ve sebebin mine’l-esbâb da‘vâ ve hakları kalmadı dedikde mukırr-ı mezbûru minvâl-i meşrûh üzere cârî ve sâdır olan ikrârında el-mukarru lehü’l-mezbûr Yani dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Zilka‘de li-sene seb‘a ve sittîn ve elf. Şühûdü’l-hâl: Mehmed Çavuş b. Ahmed, Ahmed Çavuş b. Zülfikar, Mehmed Efendi el-imâm, Receb Bey b. Abdullah, Hasan Çavuş b. Hızır ve gayruhüm mine’l-[hâzırîn.]