Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 345 Hüküm no: 328 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mahmud Çelebi b. Seyyid Arslan’a merhum Ali Kethüda b. Nasuh’a olan borcunu ödemesi için varisleri tarafından bir ay süre verildiği Husûs-ı âti’z-zikrin mahallinde tahrîri iltimâs olunmağın savb-ı şer‘-i enverden Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da merhûm Müftî Hüseyin Efendi Medresesi kurbünde Berber Mehmed Çelebi dükkânında zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde mahmiye-i mezbûrede Kalenderhâne mahallesi sükkânından es-Seyyid Mahmud Çelebi b. es-Seyyid Arslan meclis-i ma‘kūd-ı mezbûrda mahmiye-i mezbûrede Baba Hasan Alemî mahallesi sükkânından iken vefât eden Ali Kethüdâ b. Nasûh’un zevce-i menkûha[sı] olup sulbî sagīr oğlu Osman Çelebi ile sulbiye sagīre kızı İsmihan’ın tesviye-i emrlerine savb-ı şer‘den mansûbe vasîleri olan Şehbaz bt. Abdullah nâm hâtun tarafından husûs-ı âti’z-zikre vekîl-i müsecceli olan el-Hâc İbrahim Beşe b. Hüseyin mahzarında tav‘an ikrâr ve i‘tirâf edip müteveffâ-yı mezbûr Ali Kethüdâ yedinden ve malından on bin akçe ve kethüdâsı vekîli gāib ani’l-meclis Hüseyin Bey nâm cündi yedinden merkūm Ali Kethüdâ malından yüz bin akçe cem‘an yüz on bin râyic [fi’l]-vakt akçeyi bi-tarîkı’l-müdârabe ahz u kabz edip yedimde iken mezbûr Ali Kethüdâ fevt olup akd-i müdârabe bâtıl olduğundan mâ‘adâ müteveffâ-yı mezbûrun cihet-i deyn-i şer‘îden Vidin beyi olup hâlâ ma‘zûl olan Ruscuklu Mehmed Bey zimmetinde üç yük akçe hakkı olup kable’l-istîfâ mezbûr Ali Kethüdâ vefât edip meblağ-ı mezbûr verese-i mezbûrûna intikāl etmekle zevcesi müvekkile-i merkūme Şehbaz Hâtun meblağ-ı mezbûru merkūm Mehmed Bey’den taleb ve ahza beni tevkîl edip ben dahi ba‘de kabûli’l-vekâle meblağ-ı mezbûrdan yüz kırk iki bin yedi yüz on sekiz akçesini bi’l-vekâle mezbûr Mehmed Bey’den kabz edip meblağ-ı mezbûr ile bir mikdâr kara[sığır] öküzü ve karasığır ineği iştirâ ve istihlâk eylediğim ecilden hâlâ meblağ-ı mezbûr yüz kırk iki bin yedi yüz on sekiz akçe vâcibü’l-edâ deynimdir deyu tav‘an i‘tirâf edip mâl-ı müdârabeden olan meblağ-ı mezbûr yüz on bin akçeyi ve istihlâk ile deyni olan yüz kırk iki bin yedi yüz on sekiz akçeyi vasiyy-i merkūme Şehbaz Hâtun’a def‘ ve teslîme merkūm Seyyid Mahmud Çelebi ecel taleb etmekle vekîl-i merkūm el-Hâc İbrahim Beşe dahi târih-i kitâbdan otuz gün tamâmına değin te’cîl ettikden sonra mukırr-ı mezbûr Seyyid Mahmud Çelebi’nin nefsine ve hîn-i mutâlebede ihzârına yeniçeri efendisi kollukçusu olup yirmi üçüncü cemâ‘atinden olan Halil Beşe b. İsmail ile merkūm es-Seyyid Mahmud Çelebi’nin damadı olup ma‘an sâkin olan Mustafa Bey tarafından emr ve kabûlü hâviye kefâlet-i sahîha-i şer‘iyye ile kefîl olduklarında vâki‘-i hâli mevlânâ-yı mezbûr mahallinde tahrîr ve ba‘dehû meclis-i şer‘a gelip vukū‘u üzere ihbâr ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hasan Çavuş b. Hüseyin, Berber Mehmed Çelebi b. Hızır, Şa‘ban Çavuş b. Eyüb, Arslan Çavuş b. Hasan ve gayruhüm mine’l-[hâzırîn.]