Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 346 Hüküm no: 329 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Kethüda’nın karısına ve çocuklarına intikal eden alacaklarını tahsil etmek üzere vekil tayin edilen Seyyid Mahmud Çelebi’nin zimmetinde varislerine teslim edilmesi gereken 142.718 akçe olduğunu ikrar ettiği Mahmiye-i İstanbul’da Baba Hasan Alemî mahallesi sükkânından olup bundan akdem vefât eden Ali Kethüdâ b. Nasûh’un zevce-i menkûhası olup sulbî sagīr oğlu Osman Çelebi ile sulbiye sagīre kızı İsmihan’ın tesviye-i emrlerine savb-ı şer‘den mansûbe vasîleri olan Şehbaz Hâtun bt. Abdülmennân’ın vekîl-i müseccceli olan İbrahim Beşe b. Hüseyin meclis-i şer‘-i hatîrde mahmiye-i mezbûrede Haydarhane mahallesinde sâkin olan es-Seyyid Mahmud Çelebi b. es-Seyyid Arslan mahzarında bi’l-vekâle üzerine takrîr-i da‘vâ edip müteveffâ-yı mezbûrun Vidin beyi olup hâlâ ma‘zûl olan Ruscuklu Mehmed Bey zimmetinde cihet-i deyn-i şer‘îden üç yük râyic [fi’l]-vakt akçe hakkı olup kable’l-istîfâ mezbûr Ali Kethüdâ vefât edip meblağ-ı mezbûr müvekkileme ve sagīrân-ı mezbûrâna intikāl etmekle müvekkilem merkūme Şehbaz Hâtun meblağ-ı mezbûru merkūm Mehmed Bey’den da‘vâ ve taleb ve ahza mezbûr es-Seyyid Mahmud Çelebi’yi tarafeynden tevkîl ve irsâl etmekle mezbûr dahi ba‘de kabûli’l-vekâle merkūm Mehmed Bey Vidin Sancağı beyi olmağla Vidin’e varıp zikrolunan üç yük akçeden yüz kırk iki bin yedi yüz on sekiz akçesini mezbûr Mehmed Bey’den bi’l-vekâle ahz u kabz etmişiken meblağ-ı mezbûr ile bir mikdâr kara[sığır] ineği ve karasığır öküzü iştirâ edip meblağ-ı mezbûru istihlâk eylemişdir suâl olunup meblağ-ı mezbûr yüz kırk iki bin yedi yüz on sekiz akçenin mezbûr Seyyid Mahmud Çelebi’den alıverilmesin taleb ederim dedikde gıbbe’s-suâl merkūm Mahmud Çelebi cevâbında meblağ-ı mezkûru merkūm Mehmed Bey’den bi’l-vekâle ahz u kabz ve vech-i muharrer üzere karasığır ineği ve karasığır öküzleri iştirâ edip meblağ-ı mezbûr yüz kırk iki bin yedi yüz on sekiz akçeyi istihlâkle meblağ-ı mezbûr zimmetinde deyn olduğuna tav‘an ikrâr ve i‘tirâf edicek i‘tirâfı mûcebince meblağ-ı mezbûru vasiyy-i merkūma edâya merkūm Seyyid Mahmud Çelebi üzerine muvâcehesinde ilzâm olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi b. Veli, Salih Efendi b. Salih, Hüseyin Çavuş b. Hüseyin, Berber Mehmed Çelebi b. Hızır, Şa‘ban Çavuş b. Eyüb, Arslan Çavuş b. Hasan ve gayruhüm mine’l-[hâzırîn.