Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 347 Hüküm no: 330 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Abdullah’ın bazı emlakini geri dönüşü olmak kaydıyla dokuz aylığına altı bin yedi yüz akçeye Nikola v. Franko’ya sattığı Vilâyet-i Rumeli’nden Kerpiniş kasabasında Aya Andreya mahallesi ahâlîsinden Receb b. Abdullah meclis-i şer‘-i hatîr-i lâzimü’t-tevkīrde fi’l-asl kasaba-i mezkûre ahâlîsinden olup mahmiye-i İstanbul’da Tahtakale kurbünde bakkal tâifesinden râfi‘ü’l-kitâb Nikola v. Franko nâm zimmî mahzarında tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım olup mahalle-i mezbûrede vâki‘ bir tarafdan Yorgo v. Niko mülküne ve bir tarafdan Yani v. Mihalaki mülküne ve iki tarafdan tarîk-ı âmma müntehî bir bâb fevkānî ve tahtânî cemî‘ menzilimi ve menzil-i mezkûra muttasıl bostan yerimi kâffe-i hukūk ve merâfıkıyla ve yine kasaba-i mezbûre bağları hilâlinde vâki‘ İrava nâm mevzi‘de bir tarafdan Niko nâm zimmî bağına ve bir tarafdan Debbağ Yani bağına ve iki tarafdan tarîk-ı âmma müntehî olup birbirine muttasıl iki kıt‘a mülk bağlarımı dahi kâffe-i hukūk ve merâfıkıyla safka-i vâhide ile mezbûr Nikola’ya târih-i kitâbdan dokuz ay tamâmına değin bey‘ bi’l-vefâ tarîki üzere altı bin yedi yüz fıddî râyic fi’l-vakt akçeye bey‘ edip ol dahi vech-i muharrer üzere iştirâ ve kabûl eyleyip semeni olan meblağ-ı mezkûru bi’t-tamâm mezbûr Nikola yedinden ahz u kabz eylediğimden sonra menzil-i mahdûd-ı mezkûru ve zikrolunan bağları mahallinde zabt ve kabza Nikola’yı taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Mustafa Beşe b. Abdullah, Mehmed Beşe b. Mustafa, Yusuf Ağa b. Ganem, Mehmed b. Ali, Mustafa Beşe b. ( ) ve gayruhüm mine’l-[hâzırîn.]