Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 348 Hüküm no: 331 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadri ve İsmail’in babasından intikal eden alacaklarını tahsil için vekil tayin edilen Yusuf Ağa ile aralarında çıkan anlaşmazlıkta taraflara iddialarını ispat için süre verildiği Fazîletlü efendi hazretlerinin imzâsıyladır. Mahmiye-i İstanbul’da Debbâğ Yunus mahallesi sâkinlerinden olup bundan akdem vefât eden Ahmed Bey b. Süleyman’ın verâseti zevce-i metrûkesi Râbia bt. el-Hâc Ali nâm hâtuna ve sulbî kebîr oğlu Ali Çelebi’ye ve sulbî sagīr oğulları Kadri ve İsmail’e münhasıra olduğu şer‘an mütehakkık oldukdan sonra sagīrân-ı mezbûrânın kıbel-i şer‘den mansûbe vasîleri olan mezbûre Râbia tarafından husûs-ı âti’l-beyâna vekîl olup mezbûreye ma‘rifet-i şer‘iyye ile ârifân olan Mehmed Çavuş b. Abdi ve İbrahim Beşe b. Mehmed şehâdetleri ile şer‘an vekâleti sâbite olan mezbûr Ali Çelebi meclis-i şer‘-i hatîrde [47a] müvekkile-i mezbûrenin zevci bâ‘isü’l-kitâb Yusuf Ağa b. Abdullah mahzarında üzerine bi’l-vekâle takrîr-i da‘vâ edip sagīrân-ı mezbûrâna babaları müteveffâ-yı mezbûrdan irsen intikāl eden hisse-i şer‘iyyelerinin kassâm defteri nâtık olduğu üzere bazısı zimem-i nâsda olmağla müvekkile-i mezbûre merkūm Yusuf Ağa’yı cem‘ ve tahsîl ve kendiye îsâle tarafından vekîl edip ol dahi ba‘de kabûli’l-vekâle sagīrân-ı mezbûrânın el-Hâc [Ali] zimmetinde olan altmış üç bin akçe ve Andreya nâm zimmîden on sekiz bin akçe ve el-Hâc Muslı’dan otuz sekiz bin akçe ve mezbûr Andreya’dan bir def‘a on üç bin akçe ve mezbûr el-Hâc Ali’den bir def‘a dahi on bin iki yüz akçe ve Esad Efendizâde’den bin beş yüz akçe ki cem‘an yüz kırk üç bin yedi yüz akçe ahz u kabz eylediğinden gayrı mezbûr el-Hâc Ali yedinde vedî‘at olan otuz miskāl anber ile iki buçuk vakıyye öd dahi ahz u kabz eylemişdir suâl olunsun dedikde gıbbe’s-suâl mezbûr Yusuf Ağa cevâbında fi’l-hakīkat zevcem mezbûre Râbia sagīrân-ı mezbûrânın babalarından intikāl eden emvâlinden zimem-i nâsda olanı vech-i muharrer üzere kabza beni vekîl edip ben dahi ba‘de’l-kabûl ancak mezbûr el-Hâc Ali’den altmış üç bin akçe kabz edip vasiyye-i mezbûrenin emriyle sagīrân-ı mezbûrânın masârıfına sarf eyledim hak minvâl-i muharrer üzere meblağ-ı mezbûru ba‘de’l-kabz masârıf-ı sagīrân-ı mezbûrâna sarfıma izni ve kendi kabûlünü nâtık ve hat ve hatemini müştemil mu‘anven ve mersûm temessük dahi vermişdir deyu def‘le mukābele ve meblağ-ı mezbûrdan ziyâdesini kabzını inkâr edicek gıbbe’l-istintâk ve’l-inkâr evvelâ mezbûr Yusuf Ağa’dan def‘-i meşrûhunu mübeyyine beyyine taleb olundukda ityân-ı beyyine için istimhâl edip mehl-i şer‘î ile imhâl olundukdan sonra sâniyyen vekîl-i merkūm Ali Çelebi’den ziyâde mezkûreyi vedî‘a-i mezbûrenin kabzını mübeyyine beyyine [taleb] olundukda ikāmet-i beyyine için ol dahi istimhâl eyledikde mehl-i şer‘î ile imhâl olunmağın mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Efendi b. Mehmed el-kādî, Ahmed Efendi el-müderris, Mustafa Çelebi b. Osman, Hızır Beşe b. Hüseyin el-mübâşir, Abdullah Efendi imâm-ı mahalle-i mezbûre ve gayruhüm mine’l-[hâzırîn.]