Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 353 Hüküm no: 338 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhibbe bt. Gülaziz’in bazı eşya ve mücevher ile bir miktar parasını torunu Zümrüd bt. Bedros’a hibe ettiği Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da Kızıltaş mahallesinde sâkin Mehmed Çelebi’nin menziline varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde mahalle-i mezbûre kurbünde vâki‘ Cerrâh İshak mahallesi sâkinelerinden Muhibbe bt. Gülaziz nâm Ermeniye meclis-i ma‘kūd-ı mezbûrda sadriye kızının kızı olan sâhibetü hâze’l-kitâb Zümrüd bt. Bedros nâm bikr-i bâliğa mahzarında tav‘an ikrâr ve i‘tirâf edip zikri âtî hibenin sudûruna değin mülk ve hakkım olan bir beledî yüzlü döşeğimi ve bir yemeni yorganımı ve iki yemeni yüzlü yasdığımı ve bir siyâh Yanbolu kebemi ve bir sagīr kaliçemi ve bir sagīr bakır güğümümü ve bir sagīr bakracımı ve bir kebîr tenceremi ve bir sagīr tenceremi ve bir tek altın bileziğimi ve beş bin râyic [fi’l]-vakt akçemi merkūme Zümrüd’e hibe-i sahîha-i şer‘iyye ile hibe ve temlîk ve teslîm eyledim merkūme Zümrüd dahi meclis-i hibede ittihâb ve kabûl ve tesellüm eyledi min ba‘d cemî‘ eşyâ-i mevsûfe ve nukūd-ı mezbûre merkūme Zümrüd’un mülk-i mevhûbu ve hakk-ı sırfıdır keyfemâ teşâ ve tahtâr mutasarrıfe olunsun dedikde mukırre-i mezbûreyi minvâl-i meşrûh üzere cârî ve sâdır olan ikrârında el-mukarru lehâ’l-mezbûre bi’l-müvâcehe tahkīk ve bi’l-müşafehe tasdîk etdikde vâki‘-i hâli mevlânâ-yı mezbûr mahallinde tahrîr ve ba‘dehû meclis-i şer‘-i hatîre gelip vukū‘u üzere ihbâr ve takrîr etmeğin mâ-hüve’l-vâki‘ bi’t-taleb ketb ve imlâ olunup men lehâ’t-taleb yedine def‘ ve i‘tâ olundu. Fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Berber Üstâd Mahmud b. Bayezid, Attâr Hasan Beşe b. Abdullah, Sefer Beşe b. Abdullah, Ahmed b. Abdullah ve gayruhüm mine’l-[hâzırîn.]