Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 353 Hüküm no: 339 Orijinal metin no: [47b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andreya v. Tuc’un Opak kazasındaki mülk bağının yarısını Mustafa Beşe b. Abdullah’a satıp bir tarlasının yarısının da kullanım hakkını devrettiği Vilâyet-i Rumeli’nde Opar kazâsına tâbi‘ Şinikolas nâm karyeden Andreya v. Tuc nâm zimmî tarafından bey‘-i âti’l-beyânı ikrâra vekîl olup vekâleti Mehmed Beşe b. Aydın ve Sefer Beşe b. Mustafa şehâdetleriyle şer‘an sâbit olan Sarı Boyko v. Nikola nâm zimmî mahfil-i kazâda karye-i mezbûreden işbu sâhibü’l-kitâb Mustafa Beşe b. Abdullah nâm râcil mahzarında bi’l-vekâle tav‘an ikrâr ve i‘tirâf edip zikri âtî akdin sudûruna değin müvekkilim mezkûrun yedinde ve taht-ı tasarrufunda mülk ve hakkı olup karye-i mezbûre dâhilinde Poletçe nâm mevzi‘de vâki‘ bir tarafı Rasovalı Kara Ali bağına ve bir tarafı Kör Aydın b. Mehmed bağına ve bir tarafı Koli v. Şika nâm zimmî bağına ve bi-tarafı Niko v. ( ) bağına müntehî cemî‘ mülk bağının nısf-ı şâyi‘ini mezkûr Mustafa Beşe’ye üç bin beş yüz râyic [fi’l]-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzere iştirâ ve kabûl eyledikden sonra zikri âtî ferâğ ve tefvîzin sudûruna değin müvekkil-i mezkûrun yedinde ve taht-ı tasarrufunda olup karye-i mezkûre sınırı dâhilinde Zoc? Yaylası’nda Dümendere nâm mevzi‘de vâki‘ bir tarafı Mehmed Beşe b. Aydın tarlasına ve bir tarafı Mustafa b. Abdullah tarlasına ve bir tarafı Mehmed Ağa b. İbrahim tarlasına ve bir tarafı Tanaş v. ( ) tarlasına müntehî tarlasının nısf-ı şâyi‘ini mezkûr Mustafa Beşe’ye bin beş yüz akçeye [48a] ma‘rifet-i sâhib-i arz ile ferâğ ve tefvîz edip ol dahi vech-i muharrer üzere tefevvüz [ve] kabûl eyledikden sonra semen-i mezkûr üç bin beş yüz akçe ile bedel-i ferâğ olan bin beş yüz akçe cem‘an beş bin akçeyi cihet-i karz-ı şer‘îden mezkûr Mustafa Beşe zimmetinde olan beş bin akçeye takās eyledikden sonra zikrolunan nısf bağ ile nısf tarlamı mahallinde zabt u tasarrufa mezkûr Mustafa Beşe’yi taslît eyledi min ba‘d zikrolunan nısf-ı şâyi‘ bağ mülk ve hakkı ve nısf-ı şâyi‘ tarla hakk-ı müfevvazıdır keyfe mâ yeşâ mutasarrıf olunsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Hasan Beşe b. Kasım, Mustafa Beşe b. Abdullah, Ali b. Yahya, Mehmed Beşe b. Abdullah, Mustafa Efendi el-kâtib, Osman Beşe çukadâr ve gayruhüm mine’l-[hâzırîn.]