Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 354 Hüküm no: 340 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Emine bt Mehmed’in terekesi hususunda kızı Ayşe’nin kayıp olan kardeşi Ömer’in oğlu Osman aleyhine açtığı davada haksız olduğunun anlaşıldığı Üsküdar kazâsına tâbi‘ Karamürsel kasabası mahallâtından Yenimahalle sâkinelerinden olup bundan akdem vefât eden Emine bt. Mehmed nâm hâtunun verâseti sadriye kebîre kızı Âişe bt. Mustafa nâm hâtun ile li-ebeveyn karındaşı gaybet-i münkatı‘a ile gāib olmağla hayât ve memâtı ma‘lûm olmayan Ömer’e münhasıra olduğu şer‘an mütehakkık oldukdan sonra merkūme Âişe Hâtun meclis-i şer‘-i hatîr-i lâzimü’t-tevkīrde gāib-i mezbûrun sulbî kebîr oğlu olup tereke-i müteveffât-ı merkūmeden hissesini zabta savb-ı şer‘den emîn nasb olunduğu mütehakkık olan Osman Beşe mahzarında üzerine takrîr-i da‘vâ edip vâlidem merkūme Emine vefât etdikde verâseti bana ve gāib-i mezbûra münhasıra olmağla irs-i şer‘î ile terekesinin nısfı bana isâbet edip ve nısf-ı âharı gāib-i mezbûra isâbet etmekle gāib-i mezbûrun nısf hissesi savb-ı şer‘den oğlu mezbûr Osman’a emânet vaz‘ olunmağla benim nısf hisse-i şer‘iyyeme dahi nâ-hak vaz‘-ı yed eylemişdir suâl olunup hisse-i şer‘iyyemden kasr-ı yed edip bana teslîm eylemesi için mezbûr Osman’a savb-ı şer‘den tenbîh olunmasın taleb ederim dedikde gıbbe’s-suâl merkūm Osman cevâbında fi’l-hakīka müdde‘iye-i mezbûrenin vâlidesi merkūme Emine vefât etdikde verâseti mezbûre ile babam gāib-i mezbûra münhasıra oldukda ma‘rifet-i şer‘le tereke-i müteveffât-ı merkūme tahrîr ve tahmîn-i sahîh ile tahmîn ve takvîm olundukda yirmi üç bin altı yüz akçeye bâliğ oldukda meblağ-ı mezbûr yirmi üç bin altı yüz akçelik terekeden on bir bin sekiz yüz akçelik tereke mezbûre Âişe’nin hissesine isâbet edip kezâlik on bir bin yüz akçelik tereke dahi babam gāib-i mezbûrun hissesine isâbet etmekle merkūme Âişe on bir bin sekiz yüz akçe hisse-i şer‘iyyesi mukābilesinde on bir bin sekiz yüz akçe kıymetli tereke-i menkūle kabz edip ve gāib-i mezbûrun hisse-i şer‘iyyesi mukābilesinde müteveffât-ı merkūmenin ile’l-vefât mülk ve hakkı olup ba‘de vefâtihâ terekesinden olan mahalle-i mezbûrede vâki‘ beynimizde hudûdu ma‘lûm cemî‘ mülk menzil dokuz bin akçeye ve kasaba-i mezbûre bağlarında vâki‘ lede’l-ahâlî ma‘lûmü’l-hudûd olan bir kıt‘a bağ iki bin sekiz yüz akçeye cem‘an on bir bin sekiz yüz akçeye takvîm ve tahmîn ve savb-ı şer‘den bi-tarîkı’l-emâne bana teslîm olunmuşdur deyu def‘le cevâb vericek gıbbe’l-istintâk merkūme Âişe hâl minvâl-i muharrer üzere olduğunu inkâr edicek mezbûr Osman’dan def‘-i meşrûhunu mübeyyine beyyine taleb olundukta ityân-ı beyyine için istimhâl edip mehl-i şer‘î verildikden sonra merkūme Emine Hâtun anası müteveffât-ı merkūmenin terekesi vech-i meşrûh üzere tahmîn ve takvîm olundukdan sonra hissesine isâbet eden on bir bin sekiz yüz akçeyi müteveffât-ı merkūmenin tereke-i menkūlesinden tamâmen ahz u kabz ettiğine tav‘an ikrâr ve i‘tirâf edicek merkūme Âişe mu‘ârazadan men‘ [birle] mâ-hüve’l-vâki‘ bi’t-taleb ketb olundu. Tahrîren fî selhi Şevvâli’l-mükerrem li-sene 1067. Şühûdü’l-hâl: Salih Efendi b. Salih, Mehmed Efendi b. Veli Efendi, Mehmed Çelebi b. Abdülmü’min, el-Hâc Ca‘fer b. Abdullah, İsmail Çelebi b. Yunus ve gayruhüm mine’l-[hâzırîn.]