Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 355 Hüküm no: 341 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Ahmed Çelebi’nin Rus asıllı cariyesi Kâmile’yi bir miktar para ve eşyaya karşılık azat ettiği (Mükâtebe) Mahmiye-i İstanbul’da Voynuk Şücâeddin mahallesi sâkinelerinden Râbia Hâtun bt. Ahmed Çelebi tarafından husûs-ı âti’z-zikri ikrâra vekîl olup zevci İbrahim Ağa b. Mehmed ve mahalle-i mezbûrede sâkin İbrahim Efendi b. Mehmed el-imâm şehâdetleri ile şer‘an vekâleti sâbite olan Hüseyin Ağa b. Himmet meclis-i şer‘-i hatîr-i lâzimü’t-tevkīrde müvekkile-i merkūmeye rıkkını mu‘terife olan orta boylu elâ gözlü açık kaşlı Rusiyyetü’l-asl Müslimetü’l-mille hâfızu’l-vesîka Kâmile bt. Abdullah mahzarında bi’l-vekâle tav‘an ikrâr ve i‘tirâf edip merkūme Kâmile müvekkilem merkūmenin câriye-i memlûkesi olup rıkkına mu‘terife olduğu hâlde târih-i kitâbdan beş ay mukaddem üç sene tamâmına değin kendiye hizmet edip sinîn-i merkūme tamâmında sâir harâir-i asliyyât gibi hürre olmak üzere kitâbete kat‘ edip merkūme Kâmile dahi kabûl ve sinîn-i merkūme tamâmına değin müvekkilem mezbûreye hizmet etmeğe ta‘ahhüd etmişidi hâlâ merkūme Kâmile kitâbet-i mezbûreyi itmâma âcize olup fesh-i akd-i kitâbet ettikden sonra müvekkilem merkūme dahi mezbûre Kâmile’yi yüz elli akçe kıymetli bir alaca ve iki yüz akçe kıymetli bir yüz yasdığı ve altmış kıt‘a riyâlî guruş üzerine i‘tâk ve tahrîr edip mezkûr alacayı ve yüz yasdığını ve meblağ-ı mezbûr altmış kıt‘a riyâlî guruşu bi’l-vekâle merkūme Kâmile yedinden tamâmen ahz u kabz eyledim min ba‘d merkūme Kâmile sâir harâir-i asliyyât gibi hürre olup üzerinde mevâlî için utekā üzerlerinde olan hakk-ı velâdan gayrı müvekkilemin alâka ve hakkı kalmadı dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin ve’l-ışrîn min-Şevvâli’l-mükerrem li-sene 1067. Şühûdü’l-hâl: Es-seyyid Abdülfettâh b. es-Seyyid Hasan, Yahya Efendi b. ( ) el-imâm, Hasan Efendi el-müezzin, Mehmed Beşe b. Abdullah, İsa Ağa, Osman Beşe çukadâr ve gayruhüm mine’l-[hâzırîn.]