Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 356 Hüküm no: 342 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Mehmed’in Yayçe kasabasındaki iki menzilini aldığı borç karşılığında dört aylığına Mehmed Çelebi Vakfı’na rehin verip Şebniçe köyündeki yirmi adet tarlasının da kullanım hakkını devrettiği Kuzât-ı Rûmiyyeden olup muvakkaten Yayçe kādısı olan Mustafa Efendi b. Mehmed meclis-i şer‘-i hatîr-i lâzimü’t-tevkīrde mahrûse-i Galata kazâsına tâbi‘ kasaba-i Kasımpaşa’da Tahtakadı mahallesinde vâki‘ Mehmed Çelebi b. Sefer nâm kimesnenin eczâ-i şerîfe tilâvet olunmak için vakfeylediği nukūda bi’l-fi‘il mütevellî olan Mustafa Çelebi b. İsmail mahzarında ikrâr ve takrîr-i kelâm edip zikrolunan Yayçe kasabasında Câmi‘-i hâssa mahallesinde vâki‘ bir tarafı Hindizâde demekle şehîr ( ) nâm kimesne mülküne ve bir tarafı Halvethâne ta‘bîr olunur obaya ve iki tarafı tarîk-ı âmma müntehî bir bâb tahtânî odayı ve iki soba ve bir çardağı ve mahzeni ve bahçeyi müştemil olan mülk menzilimi cemî‘ tevâbi‘ ve levâhıkı ile ve yine kasaba-i mezbûre kurbünde Şebniçe nâm karyede vâki‘ bir tarafdan merhûm Ömer veresesi mülkleri ve bir tarafdan yine benim mülküm ve iki tarafdan tarîk-ı âm ile mahdûd bir bâb tahtânî ve bir bâb fevkānî odaları ve bir çardağı ve cüneyneyi müştemil mülk menzilimi kâffe-i hudûd ve hukūk ve merâfıkı ile târih-i kitâbdan yedi yüz yirmi gün tamâmına değin yüz kıt‘a riyâlî guruşa bey‘ bi’l-vefâ tarîki ile mütevellî-i mezbûr Mustafa Çelebi’ye bey‘ ol dahi vech-i muharrer üzere mâl-ı vakf-ı mezbûr ile iştirâ ve kabûl edip yine kasaba-i mezbûrede zikrolunan Şebniçe karyesinde [48b] mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd tahmînen otuz keyl tohum isti‘âb eder yirmi kıt‘a tarlalarımın dahi hakk-ı tasarrufunu ma‘rifet-i sâhib-i arz ile otuz riyâlî guruşa târih-i kitâbdan yedi yüz yirmi gün tamâmına değin mütevellî-i mezbûra tefvîz bi’l-vefâ tarîki ile ferâğ ve tefvîz ol dahi tefevvüz ve kabûl eyledikden sonra semen-i mezbûr yüz riyâlî guruş ile bedel-i merkūm otuz riyâlî guruş ki cem‘an yüz otuz kıt‘a riyâlî guruşu tamâmen ahz u kabz edip menzileyn-i mezbûreyn ile arâzi-i merkūmeyi mahallinde kabz ve tasarrufa mütevellî-i mezbûru taslît eyledim dedikde gıbbe’t-tasdîkı’l-mu‘teber bey‘-i mezbûr hakīkatde rehin olmağın zikrolunan Câmi‘-i hâssa mahallesi sükkânından Ömer b. Mehmed nâm kimesne ( ) mezbûra emr ve kabûlü hâviye kefâlet-i sahîha ile kefîl olup mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Abbas Bey b. Hâcı Mehmed, el-Hâc Mehmed b. Murtaza, Hâcı Süleyman Bey b. Hâcı Şa‘ban, Şâtır Muslı Bey, Şâtır Fazlı Ağa, Abdulbâki Efendi b. Hasan Ağa, Mehmed Efendi b. Murtaza.