Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 357 Hüküm no: 343 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın Feyzullah Efendi’den ödünç para aldığı Mahmiye-i İstanbul’da Molla Hüsrev mahallesi sâkinelerinden Fâtıma bt. Abdullah nâm hâtun tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Osman Çelebi b. Abdullah ve Abdülgaffar Çelebi b. Abdullah şehâdetleriyle şer‘an vekâleti sâbite olan Mehmed Bey b. Ramazan nâm kimesne meclis-i şer‘-i hatîr-i lâzimü’t-tevkīrde umdetü’l-müderrisîni’l-kirâm zübdetü’l-muhakkıkīni’l-fihâm Feyz[ullah] Efendi b. neclü’l-merhûm Osmanzâde Mehmed Efendi tarafından ikrâr-ı âti’l-beyânı tasdîka vekîl olup vekâleti İbrahim Beşe b. Mehmed ve el-Hâc Ali Çelebi b. Murad şehâdetleriyle şer‘an sâbite olan Piyale Bey b. Abdullah mahzarında bi’l-vekâle ikrâr ve takrîr-i kelâm [edip] müvekkilem mezbûre Fâtıma Hâtun’un silk-i mülkünde olup mahalle-i mezbûrede vâki‘ bir tarafdan Âişe Hâtun Vakfı olup Mustafa Efendi tasarrufunda olan menzil ve bir tarafdan el-Hâc Hasan veresesi mülkleri ve bir tarafdan Ahmed Beşe b. Yusuf mülkü ve bir tarafdan tarîk-ı âm ile mahdûd büyût-ı adîdeyi müştemil mülk menzilini bi-cümleti’t-tevâbi‘ ve’l-levâhık müvekkil-i mûmâ-ileyh Feyzullah Efendi’ye iki yüz elli kıt‘a riyâlî guruşa bi-tarîkı’l-istiğlâl bey‘ ve teslîm edip ol dahi ba‘de’t-tahliyeti’ş-şer‘iyye ve’t-tekābuzı’l-mer‘î vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr iki yüz elli riyâlî guruşu tamâmen müvekkil-i mezbûr Feyzullah Efendi yedinden ahz u kabz edip menzil-i mezbûru târih-i kitâbdan bir sene tamâmına değin otuz yedi buçuk riyâlî guruşa müvekkilem mezbûre Fâtıma Hâtun’a îcâr ve teslîm edip ol dahi vech-i muharrer üzere istîcâr ve tesellüm eyledi dedikde gıbbe’t-tasdîkı’ş-şer‘î yine mahalle-i mezbûrede sâkin mezbûr Osman Çelebi b. Abdullah derk-i menzil-i mezbûra ve ücret-i merkūmesine emr ve kabûlü hâviye kefâletle kefîl olmağın mâ-vaka‘a bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-sene 1067. Şühûdü’l-hâl: Şa‘ban Efendi b. Halil imâm-ı Yarhisar, Mehmed Çelebi b. Hasan müezzin-i Sinan Ağa, Ali Efendi el-kādî, Mustafa Efendi b. Muharrem el-imâm, Mehmed Efendi el-Kādî ve gayruhüm mine’l-[hâzırîn.]