Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 358 Hüküm no: 344 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdad eski ağası Haseki Ali Ağa’nın Timurtaş mahallesindeki mülk menzilini Sabuncu Dede Mehmed b. Yunus’a sattığı Mahmiye-i İstanbul’da Sinan Paşa mahallesinde sâkin olup sâbıkā Bağdad ağası olan Haseki Ali Ağa b. Ahmed tarafından bey‘-i âti’l-beyânı ikrâra vekîl olup vekâleti mahmiye-i mezbûrede Gül Câmi‘i mahallesinde sâkin olan Mehmed Çelebi b. Abdullah ve es-Seyyid Murtaza Çelebi b. es-Seyyid Ramazan şehâdetleri ile şer‘an sâbite olan Salih Çelebi b. Şeyhî Efendi meclis-i şer‘-i hatîr-i lâzimü’t-tevkīrde sâhibü hâze’l-kitâb Sabuncu Dede Mehmed b. Yunus mahzarında bi’l-vekâle tav‘an ikrâr ve i‘tirâf edip müvekkilim mezbûr Haseki Ali Ağa şirâ-ı şer‘ ile benden iştirâ ve kabz etmekle zikri âtî akdin sudûruna değin silk-i mülk-i sahîhinde münselik olup mahmiye-i mezbûrede Timurtaş mahallesinde vâki‘ bir tarafdan mahalle-i mezbûre imâmına meşrûta vakıf menzile ve iki tarafdan hâlâ yeniçeri efendisi olan mefharü erbâbi’t-tahrîr ve’l-kalem Koyunzâde Mehmed Efendi mülküne ve bir tarafdan tarîk-ı âmma müntehî olup tabaka-i ulyâsı iki bâb odayı ve dehlîzi ve tabaka-i vüstâsı bir bâb odayı ve kenîfi ve tahtında ahırı müştemil olan cemî‘ mülk menzilini kâffe-i hukūk ve merâfıkı ile kırk üç bin râyic [fi’l]-vakt akçeye mezbûr Dede Mehmed’e tarafeynden îcâb ve kabûlü hâvî bey‘-i sahîh ile bâtten bey‘ ve teslîm edip mezbûr dahi nefsi’çün iştirâ ve kabûl ve tesellüm ettikden sonra semen-i merkūm kırk üç bin akçeyi müvekkil-i mezbûra tamâmen def‘ ü teslîm ol dahi ahz u kabz eyledi min ba‘d cemî‘ menzil-i mezbûr merkūm Dede Mehmed’in mülk-i müşterâsıdır keyfe mâ yeşâ ve yahtâr mutasarrıf olunsun dedikde mukırr-ı mezbûru bi’l-vekâle cârî ve sâdır olan ikrârında el-mukarru lehü’l-mezbûr dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb ve imlâ ve men lehü’t-taleb yedine def‘ ve i‘tâ olundu. Fi’l-yevmi’l-hâmis min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Mefharü’l-emâsil Mehmed Ağa kethüdâ-yı Vezîr Murad Paşa, Mefharü’l-akrân Baltacı Davud Ağa mütevellî-i Mahmud Paşa, Fahrü’l-akrân Celeb Mehmed Ağa b. Abdullah, Dilaver Ağa b. Abdullah, el-Hâc Nimetullah b. Abdullah, Mehmed Beşe b. Abdullah, Ahmed Çelebi, Ahmed b. Mahmud, Mehmed tâbi‘-i Dilaver Ağa, el-Hâc Mehmed Çelebi el-yesârî, el-Hâc Mustafa Bey, el-Hâc İsa Bey teberdâr, Dilaver Beşe b. Abdullah, Mehmed Çelebi el-yesârî, Mehmed Çelebi b. Abdullah el-yesârî, Sabunî el-Hâc Mustafa.