Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 360 Hüküm no: 346 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah’ın velayeti altındaki küçük kızı Fâtıma’yı evlendirdiği Seyyid Haşim b. Seyyid Ahmed’den muhalaa yoluyla boşayıp damadının zimmetini ibra ettiği Mahmiye-i İstanbul’da Çerâğî [Hamza] mahallesi sükkânından Yusuf b. Abdullah nâm kimesne meclis-i hatîrde damadı işbu bâ‘isü’l-vesîka Seyyid Hâşim b. es-Seyyid Ahmed mahzarında tav‘an ikrâr ve takrîr-i kelâm edip sulbiye sagīre kızım Fâtıma’yı bundan akdem altı bin akçe mehr-i müeccel ile velâyetim hasebiyle mezbûr Seyyid Hâşim’e tezvîc ve inkâh ol dahi tezevvüc ve kabûl edip mezbûr Seyyid Hâşim sagīre-i mezbûreye dâhil ve halvet-i sahîha olmamağın hâlâ kızım sagīre-i mezbûrenin nısf mehri olup zevci mezbûr Seyyid Hâşim zimmetinde mütekarrir ve ma‘kūdun-aleyh üç bin [akçe] mehr-i müecceli üzerine yine velâyetim hasebiyle zevci mezbûr Seyyid Hâşim ile muhâla‘a-i sahîha-i şer‘iyye muhâla‘a edip ol dahi vech-i muharrer üzere hul‘-ı mezbûru kabûl eyledikden sonra zevciyyete ve gayra müte‘allika cemî‘ de‘âvîden mezbûr Seyyid Hâşim’in zimmetini ibrâ-i âm ile ibrâ eyledim eğer kızım mezbûre Fâtıma bâliğa olup mehr-i müecceli olan meblağ-ı mezbûr da‘vâsına tasaddî ederse ben dâmin oldum dedikde gıbbe’t-tasdîkı’l-mu‘teber mezbûr Yusuf damadı merkūm Seyyid Hâşim mahzarında iâde-i kelâm edip mezbûr Seyyid Hâşim’in vazîfesi berâtlerine bundan akdem emri ile malımdan bin beş yüz yirmi akçe harc u sarf etmişidim hâlâ meblağ-ı mezbûrdan dahi mezbûr Seyyid Hâşim’in zimmetini ibrâ ve ıskāt eyledim min ba‘d kıbelinde bir akçe ve bir habbe hakkım kalmadı dedidke gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene 1067. Şühûdü’l-hâl: Mustafa Efendi el-Kādî bi-medîneti Dimyat muvakkaten, Mehmed Efendi b. Ali, Mehmed Çelebi b. Ali, Ahmed b. Ali, es-Seyyid Lütfullah Çelebi b. es-Seyyid Mehmed el-müderris, Arslan Bey b. Hasan, Mahmud Bey b. Ahmed, Mehmed Bey b. Abdullah.