Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 360 Hüküm no: 347 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Abdulbâki Çelebi b. Ahmed’in Bayram Paşa Vakfı’ndan ödünç para aldığı (Bey‘ bi’l-istiğlâl) Mahmiye-i İstanbul’da Çerâğî Hamza mahallesinde sâkin el-Hâc Abdulbâki Çelebi b. Ahmed nâm yesârî meclis-i şer‘-i hatîr-i lâzimü’t-tevkīrde mahmiye-i mezbûrede merhûm Bayram Paşa Vakfı’na bi’l-fi‘il mütevellî olan Ahmed Efendi b. Abdurrahman mahzarında ikrâr ve takrîr-i kelâm edip zikri âtî akdin sudûruna değin silk-i mülkümde münselik mülk ve hakkım olup mahalle-i mezbûrede vâki‘ bir tarafı el-Hâc Mehmed b. Abdullah veresesi mülklerine ve bir tarafı Mustafa Çelebi b. Receb Bey mülküne ve bir tarafı Medîne-i Münevvere Vakfı olup el-Hâc Piyale tasarrufunda olan menzile ve bir tarafı tarîk-ı âmma müntehî cemî‘ mülk menzilimi cümle-i tevâbi‘ ve levâhıkı ve âmme-i menâfi‘ ve merâfıkı ile mütevellî-i merkūm Ahmed Efendi’ye üç yüz kırk kıt‘a riyâlî kebîr guruşa bi-tarîkı’l-istiğlâl bey‘ ve teslîm edip ol dahi mâl-ı vakf-ı mezbûr ile iştirâ ve tesellüm eyledikden sonra semen-i mezkûr üç yüz kırk kıt‘a riyâlî guruşu mâl-ı vakf-ı mezbûrdan mütevellî-i merkūm Ahmed Efendi bana tamâmen def‘ ü teslîm edip ben dahi ahz u kabz eyledikden sonra merkūm Ahmed Efendi menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzı’l-mer‘î târih-i kitâbdan bir sene tamâmına değin elli bir kıt‘a riyâlî guruşa bana îcâr ve teslîm edip ben dahi vech-i muharrer üzere istîcâr ve kabûl ve tesellüm eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fî selhi Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Efendi b. Mustafa kâtib-i vakf-ı mezbûr, Mustafa Dede b. Şa‘ban, Şa‘ban Dede el-müezzin, İlyas Dede b. Resul, Mehmed Dede b. Hâcı, Hasan Dede el-müezzin, Osman Beşe çukadâr.