Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 361 Hüküm no: 348 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Ali’nin sattığı eşya bedeli ve elden verdiği borç olarak kırk guruş alacağı olduğu iddiasıyla Hasan b. Ali aleyhine açtığı davada iddiasını ispat edemediği Vilâyet-i Anadolu’da Trabzon Eyâleti’nde Arhova (Arhavi) kazâsına tâbi‘ Kise nâm karye sâkinelerinden Safiye bt. Ali nâm hâtun meclis-i şer‘-i hatîr-i lâzimü’t-tevkīrde yine karye-i mezbûre sâkinlerinden bâ‘isü’l-kitâb Hasan b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan yedi sene mukaddem silk-i mülkümde muntazam olup yedimde mülk ve hakkım olan veznde dokuz miskāl bir çift altın küpemi on dokuz riyâlî guruşa ve bir tüfengimi iki guruşa ve her topu ikişer guruşa olmak üzere Trabzon bezi ta‘bîr olunur yedi top keten bezimi on dört guruşa cem‘an eşyâ-yı mezkûreyi mezbûr Hasan’a otuz beş kıt‘a riyâlî guruşa bey‘ ve teslîm ol dahi yedimden iştirâ ve kabz eyleyip beş riyâlî guruş dahi ikrâz ve teslîm ol dahi yedimden iktirâz ve kabz edip cem‘an karz ve eşyâ semenlerinden kırk kıt‘a riyâlî guruş hakkım olup taleb ve ahza zafer bulmamağla zimmetinde kalmışidi hâlâ taleb eylediğimde edâdan imtinâ‘ eder suâl olunup alıverilmesi matlubumdur dedikde gıbbe’s-suâl ve akībe’l-inkâr merkūme Safiye’den müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ târih-i kitâbdan yedi sene mukaddem merkūme Safiye yedinden veznde dokuz miskāl bir çift altın küpe on dokuz riyâlî guruşa ve bir tüfengi iki guruşa ve her topu ikişer guruşa olmak üzere Trabzon bezi ta‘bîr olunur yedi top keten bezini on dört guruşa cem‘an eşyâ-yı mezkûreyi otuz beş kıt‘a riyâlî guruşa iştirâ ve kabz etmeyip beş guruş dahi iktirâz ve kabz etmeyip cem‘an karz ve eşyâ semenlerinden merkūme Safiye’nin kırk kıt‘a riyâlî guruş hakkı zimmetinde olmayıp ol vechile merkūme Safiye’ye kırk kıt‘a riyâlî guruş deyni olmadığına merkūm Hüseyin’e yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin bî-vech mu‘ârazadan men‘ olunup mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ min-Zilka‘deti’ş-şerîfe li-sene 1067. Şühûdü’l-hâl: Salih Efendi el-kādî, Mustafa Efendi b. Muharrem, Osman Beşe çukadâr, İsa Bey b. Ahmed, Salih Mehmed Çelebi el-mukayyid ve gayruhüm mine’l-[hâzırîn.]