Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 363 Hüküm no: 350 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Ağa b. Abdülmennan’ın İstinye’de Boğazkesen Kalesi haricindeki mülk menzilini karısı Belkıs bt. Abdülvehhab’a bin altına sattığı Efendi hazretlerinin imzâsıyladır. Mahmiye-i İstanbul’da sâbıkā gümrük emîni olan iftihârü’l-emâcid ve’l-ekârim câmi‘u’l-mehâmid ve’l-mekârim Yahya Ağa b. Abdülmennân meclis-i şer‘-i hatîrde zevcesi fahrü’l-muhadderât hâfızetü hâze’l-kitâb Belkıs Hâtun bt. Abdülvehhab tarafından ikrâr-ı âtîyi tasdîka vekîl olup bi-mâ-hüve nehcü’s-sübût vekâleti sâbite olan umdetü’l-a‘yân kıdvetü’l-erkân Yusuf Ağa b. Mehmed mahzarında ikrâr ve i‘tirâf edip silk-i mülkümde münselik olup mahrûse-i Galata muzâfâtından İstinye nâhiyesine tâbi‘ Boğazkesen Kal‘ası hâricinde vâki‘ bir tarafı Mustafa Çelebi mülküne ve bir tarafı sâhil-i bahre ve bir tarafı Mehmed Çelebi mülküne ve bir tarafı tarîk-ı âmma müntehî hâricen ve dâhilen büyûtu hâvî mülk menzilimi cemî‘ hudûd ve hukūk ve müştemilâtı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezkûre Belkıs Hâtun’a bin altına bey‘ ve teslîm ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr bin altını yedinden tamâmen ahz u kabz edip ba‘de’l-yevm menzil-i mahdûd-ı mezkûr zevcem merkūmenin mülk-i müşterâsıdır keyfemâ teşâ mutasarrıfe olunsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: Umdetü’l-müderrisîni’l-kirâm Hüsamzâde Şeyh Mehmed Efendi, Mustafa Efendi el-kādî, Sadi Efendi el-kādî, Mehmed Efendi b. Mehmed el-imâm, Resul Halîfe el-kayyûm, el-Hâc Hüseyin Halîfe el-müezzin, Ali Çelebi b. Mustafa ve gayruhüm mine’l-[hâzırîn.]