Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 364 Hüküm no: 351 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Ağa b. Abdülmennan’ın İstinye’ye bağlı Büyükdere köyündeki mülk evini karısı Belkıs Hatun’a bin beş yüz altına sattığı Fazîletlü efendi hazretlerinin imzâsıyladır. Mahmiye-i İstanbul’da sâbıkā gümrük emîni olan iftihârü’l-emâcid ve’l-ekârim câmi‘u’l-mehâmid ve’l-mekârim Yahya Ağa b. Abdülmennân meclis-i şer‘-i hatîrde zevcesi fahrü’l-muhadderât hâfizetü hâze’l-kitâb Belkıs Hâtun tarafından ikrâr-ı âtîyi tasdîka vekîl olup nehc-i şer‘î ve vech-i mer‘î üzere vekâleti sâbite olan umdetü’l-a‘yân kıdvetü’l-erkân Yusuf Ağa b. Mehmed mahzarında ikrâr ve i‘tirâf edip silk-i mülkümde münselik olup mahrûse-i Galata muzâfâtından İstinye nâhiyesinde Büyükdere nâm karyede vâki‘ bir tarafı Çorbacıoğlu mülküne ve bir tarafı cebel ve bir tarafı hadîka-i hâssa ve bir tarafı [tarîk-ı] âmma müntehî büyûtu hâvî mülk menzilimi cemî‘ hudûd ve hukūk ve müştemilâtı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezkûre Belkıs Hâtun’a bin beş yüz altına bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûr bin beş yüz altını yedinden tamâmen ahz u kabz edip ba‘de’l-yevm menzil-i mahdûd-ı mezkûr zevcem merkūmenin mülk-i müşterâsıdır keyfemâ teşâ ve tahtâr mutasarrıfe olunsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî evâhiri Şevvâli’l-mükerrem li-sene seb‘a ve sittîn ve elf. Şühûdü’l-hâl: es-Sâbıkūn.