Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 364 Hüküm no: 352 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Çörekçi Sinado v. Nikola’nın terekesi hususunda kızları Ezmerağda, İskeli ve Ralinse’nin karısı İstemata bt. Andreya ile üç yüz guruş üzerine sulh oldukları Mahmiye-i İstanbul hısnı ebvâbından Kumkapı dâhilinde vâki‘ Çadırcı Ahmed mahallesi sükkânından olup bundan akdem hâlik olan Çörekçi Sinado v. Nikola nâm zimmînin verâseti zevce-i metrûkesi İstemata bt. Andreya nâm Nasrâniye’ye ve sulbiye kebîre kızı Ezmarağda nâm Nasrâniye ile sulbiye sagīre kızları İskeli ve Ralinse’ye münhasıra olduğu şer‘an mütehakkık oldukdan sonra merkūme Ezmerağda’nın zevci olup husûs-ı âti’z-zikri sulh ve ibrâya vekîl-i sâbitü’l-vekâlesi olan Çörekçi Androçe vekâleten ve sagīretân-ı mezbûretânın tesviye-i emrlerine savb-ı şer‘-i enverden mansûb vasîleri olan Petro v. Dimitri nâm zimmî vesâyeten meclis-i şer‘-i hatîr-i lâzimü’t-tevkīrde hâlik-i mezbûrun zevce-i metrûkesi olan hâmiletü hâze’l-kitâb merkūme İstemata mahzarında herbiri tav‘an ikrâr ve i‘tirâf edip hâlik-i mezbûrun terekesinden olan beş yüz kıt‘a riyâlî guruşu hâlik-i mezbûrun terekesinden olmasına ba‘de’l-i‘tirâf cümlemizin ittifâkı ile merkūme İstemata îdâ‘ ve def‘ ve teslîm edip ol dahi ahz u kabz etmişidi hâlâ meblağ-ı mezbûrdan müvekkile-i merkūme ile sagīretân-ı mezbûretânın hisselerini merkūmeden taleb ettiğimizden merkūme İstemata cevâbında meblağ-ı mezbûr benim mülk ve hakkımdır deyu iddiâ ve mukaddemâ hâlik-i mezbûrun terekesinden olmasına i‘tirâfını inkâr etmekle biz dahi vech-i meşrûh üzere meblağ-ı mezbûr hâlik-i mezbûrun terekesinden olmasına merkūme İstemata’nın i‘tirâfını isbâtdan âciz olup nice eyyâm beynimizde nizâ‘-ı mütemâdî olup bi’l-âhare merkūme İstemata[’ya] yemîn teveccüh edip arz olundukda yemîn billâhi’l-lezî enzele’l-İncîle alâ İsa aleyhisselâm etmeğe teveccüh etdikde beynimizde muslihûn tavassut edip bizi mezbûre İstemata ile meblağ-ı mezbûrdan müvekkile-i mezbûre ile sagīretân-ı mezbûretânın hisse-i şer‘iyyeleri da‘vâsından üç yüz riyâlî guruş üzerine sulh eylediklerinde biz dahi sulh-ı mezbûru sagīretân-ı mezbûretân enfa‘ olmağla bi’l-vesâye ve bi’l-vekâle sulh-ı mezbûru kabûl ve bedel-i sulh olan meblağ-ı mezbûru merkūme İstemata yedinden meclis-i sulhda tamâmen ahz u kabz edip bâkīsi da‘vâsından bi’l-vekâle ve bi’l-vesâye fâriğa olduk min ba‘d meblağ-ı mezbûra müte‘allik müvekkile-i mezbûre ile sagīretân-ı mezbûretânın merkūme İstemata üzerine da‘vâ ve hakları kalmadı dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Umdetü’s-sâlikîn eş-Şeyh İvaz Efendi, Murtaza Bey b. Hüseyin subaşı-i vakf-ı Vâlide Sultân, Mustafa Çelebi b. Mehmed emîn-i beytü’l-mâl-i âmme, Mehmed Çavuş b. Abdullah, Ahmed Çavuş b. Mehmed, Osman Beşe çukadâr ve gayruhüm mine’l-[hâzırîn.]