Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 365 Hüküm no: 353 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef, Salamon, Royani ve Simnon tarafından bir husus için Mudanya’ya gönderilen David v. Yasef’in yolda öldürülmesi üzerine varisleri tarafından gönderenler aleyhine açılan diyet davasının geçersiz olduğu Mahrûse-i Bursa’da Kedüz cemâ‘atinden olup Kuruçeşme mahallesi ahâlîsinden iken mahrûse-i mezkûreden Mudanya’ya gider iken maktûlen hâlik olan David v. Yasef nâm Yahudi’nin verâseti [zevce-i] metrûkesi Bone bt. Kemal nâm Yahudiyyeye ve sulbî sagīr oğulları Yasef ve David ve Semuyil’e ve sulbiye sagīre kızı Sitori’ye münhasıra olduğu ve sıgār-ı mezkûrûnun vâlidesi [50a] mezkûre Bone tesviye-i umûrları için kıbel-i şer‘den mansûbe vasîleri olduğu şer‘an mütehakkık oldukdan sonra mezkûre Bone asâleten ve vesâyeten meclis-i şer‘-i hatîr-i lâzimü’t-tevkīrde mahrûse-i mezkûrede Mayer cemâ‘atinden Yasef ve Salamon veledey Mosi ve Royani ve Simnon veledey İsak nâm Yahudiler taraflarından ikrâr-ı âti’l-beyânı tasdîka vekîl olup Kedüz cemâ‘atinden İsak v. Hayim ve Küçük Sisilye cemâ‘atinden Mosi v. Menteş nâm Yahudiler şehâdetleri ile vekâleti sâbite olan hâlâ mahrûse-i mezbûre Yahudileri kethüdâsı Mosi v. David nâm Yahudiler muvâcehesinde bi-tav‘ihâ ikrâr ve i‘tirâf edip zevcim ve mûrisim hâlik-i mezbûr David’i bundan akdem hâl-i hayâtında müvekkilûn-ı mezkûrûn Yasef ve Salamon ve Royani ve Simnon beynlerinde bir husûs için mahrûse-i mezkûreden Mudanya nâm kasabaya taraflarından ücretle irsâl ettiklerinde zevcim mezbûr David’in esnâ-yi tarîkde katl olunduğu mesmû‘um olmağın ben dahi asâleten ve vesâyetim hasebiyle zevcim mezbûr David’in dem ve diyetini siz sebeb oldunuz deyu müvekkilûn-ı mezkûrundan da‘vâ ve taleb sadedinde olduğumda bu bâbda müvekkilûn-ı mezkûrunun hâlâ şeyhülislâm ve müftî’l-enâm olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în hazretlerinden yedlerinde olan fetvâ-yı şerîfelerinde “dört nefer kimesne bir maslahat için ücretle Zeyd[’i] âhar diyara gönderdiklerinde esnâ-i tarîkde Zeyd katl olunmuş olsa hâlâ Zeyd’in veresesi ol kimesnelere siz göndermekle sebeb olmuş oldunuz elbette diyetini verin deyip ol kimesnelerden bir nesne almağa kādir olurlar mı dedikde cevâb-ı bâ-savâbında olmaz” deyu buyurulmağın da‘vâ-yı mezkûrem mubtile olmağla ben dahi da‘vâ-yı mezkûremden müvekkilûn-ı mezkûrunu ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Fahrü’l-müderrisîn Mehmed Efendi b. Ali, Ali Efendi el-kādî, Ahmed Efendi el-kādî, İsa Bey b. Ahmed ve gayruhüm mine’l-[hâzırîn.]