Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 366 Hüküm no: 354 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hasan b. Cafer’in hayatta iken sattığı bağ bedelinden Ali Bali b. Halil zimmetinde kalan iki bin akçenin varislerine ödenmesine karar verildiği Medîne-i Üsküdar kazâsı muzâfâtından Karamürsel nâhiyesine tâbi‘ Ulaşlı nâm karyede sâkin iken bundan akdem vefât eden Hasan b. Ca‘fer nâm kimesnenin verâseti zevce-i metrûkesi Camhan nâm hâtun ile sulbî kebîr oğlu Ahmed Beşe’ye ve sulbiye kebîre kızları Sâime ve Fâtıma’ya ve sulbiye sagīre kızı Rahime’ye münhasıra olduğu şer‘an zâhir ve mütehakkık oldukdan sonra mezbûre Camhan kendi tarafından asâleten ve sagīre-i mezbûrenin tesviye-i umûruna kıbel-i şerî‘at-i mergūbe[den] mansûbe vasîsi olmağla vesâyeten ve mezbûrân Ahmed Beşe ve Sâime dahi asâleten meclis-i şer‘-i hatîr-i lâzimü’t-tevkīrde Ali Bâli b. Halil mahzarında herbiri da‘vâ ve takrîr-i kelâm edip babamız müteveffâ-yı mezbûrun mülkü olup karye-i mezbûrede vâki‘ bir tarafı Süleyman b. Ya‘kub bağına ve bir tarafı Deli Yusuf b. Hızır bağına ve bir tarafı Mustafa Dede bağına ve bir tarafı [tarîk-ı] âmma müntehî bağını müteveffâ-yı mezbûr hâl-i hayâtında târih-i kitâbdan sekiz sene mukaddem sekiz bin nakd-i râyic fi’l-vakt akçeye mezbûr Ali Bâli’ye bey‘ ol dahi vech-i muharrer üzere ba‘de’l-iştirâ ve’t-tesellüm semen-i mezbûr sekiz bin akçeyi müteveffâ-yı mezbûr kable’l-ahz ve’l-istîfâ vefât eyledikde meblağ-ı mezbûr irsen bize isâbet ve intikāl eyledikden sonra mezbûr Ali Bâli semen-i mezbûrun iki bin akçesini bundan akdem mezbûre Camhan’a teslîm ol dahi ahz u kabz edip semen-i bâkī altı bin akçe hâlâ bize ve sagīre-i mezbûreye isâbet eden dört bin dokuz yüz elli [akçeyi] mezbûr Ali Bâli’den taleb eylediğimizde edâdan imtinâ‘ eder suâl olunsun dedikde gıbbe’s-suâl mezbûr Ali Bâli cevâbında fi’l-hakīka târih-i mezbûrda zikri mürûr eden bağı müteveffâ-yı mezbûrdan hayâtında ben meblağ-ı mezbûr sekiz bin akçeye iştirâ ve kabz edip semen-i mezbûrun altı bin akçesini yine hayâtında müteveffâ-yı mezbûra edâ ve teslîm ol dahi ba‘de’l-ahz ve’t-tesellüm vefât eyledikde semen-i mezbûrdan zimmetimde bâkī kalan iki bin akçeyi dahi mezbûre Camhan Hâtun’a def‘ ve teslîm edip semen-i mezbûrdan zimmetimde bir akçe ve bir habbe kalmamışdır deyu def‘le mukābile edicek akībe’l-istintâk ve’l-inkâr mezbûr Ali Bâli’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka mezbûrûn Camhan ve Ahmed Beşe [ve] Sâime’ye zikri mürûr eden bağın semeninden mûrisleri müteveffâ-yı mezbûr hayâtında mezbûr Ali Bâli’den altı bin akçe ahz u kabz eylediğini bilmediklerine yemîn teklîf olundukda onlar dahi hasbe’l-mes’ûl yemîn billâhi’l-aliyyi’l-a‘lâ etmeğin mûcibiyle ba‘de’l-hükm mâ-vaka‘a bi’t-taleb ketb olundu. Hurrire fi’l-yevmi’s-sâlis min-Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Mehmed Çavuş el-mübâşir, İsa Bey b. Ahmed, Osman Beşe çukadâr, İbrahim b. Ömer el-cündi ve gayruhüm mine’l-[hâzırîn.]