Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 367 Hüküm no: 355 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef v. Semuyil’in Müslüman olmadan önce Spinoza cemaatine hibe ettiği Tevrat’ını Müslüman olup Mehmed ismini aldıktan sonra geri almak istemesi üzerine çıkan anlaşmazlıkta beş bin akçe üzerine cemaatle sulh olduğu Mahmiye-i İstanbul’da Müftî Hamamı kurbünde sâkin olup mukaddemâ ismi Yasef v. Semuyil olup ba‘dehû şeref-i İslâm ile müşerref oldukda ismi Mehmed olan mühtedî meclis-i şer‘-i hatîrde mahmiye-i mezbûrede Spinoza cemâ‘atinden olup ve cemâ‘at-i mezkûrenin kethüdâları olan David v. Avraham nâm Yahudi tarafından sulh-ı âti’l-beyânı tasdîka vekîl olup vekâleti bi-mâ-hüve nehcü’s-sübût şer‘an sâbit olan işbu bâ‘isü’l-vesîka Yakob v. Yasef nâm Yahudi muvâcehesinde ikrâr ve takrîr-i kelâm edip bundan akdem küfrümde yedimde mülk ve hakkım olan sekiz bin akçe kıymetli bir cild Tevratımı cemâ‘at-i mezkûre ahâlîsinden ( ) hibe-i sahîha-i şer‘iyye ile hibe ve teslîm edip ba‘dehû şeref-i İslâm ile müşerref olduğumda hibe-i mezkûremden rücû‘ edip hâlâ taleb ve da‘vâ eylediğimde onlar dahi bana def‘ ve teslîmde te‘allül etmeleriyle beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezkûremden beni cemâ‘at-i mezkûrenin kethüdâları olan müvekkil-i mezkûr ile beş bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı [mezkûr] beş bin akçeyi müvekkil-i mezkûr David yedinden tamâmen ahz u kabz edip husûs-ı mezkûra müte‘allik âmme-i da‘vâdan cemâ‘at-i mezkûre ahâlîsinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde mâ-hüve’l-vâki‘ kayd şüd. Fi’l-yevmi’s-sâlis ve’l-ışrîn min-Zilka‘deti’ş-şerîfe li-sene 1067. Şühûdü’l-hâl: Mustafa Efendi b. Muharrem, Ali Efendi el-kādî, Osman Beşe çukadâr, İsa Bey b. Ahmed ve gayruhüm mine’l-[hâzırîn.]