Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 368 Hüküm no: 356 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikogos v. Mildon ve karısı Şahmelek’in Şeyh Ferhad mahallesindeki mülk menzillerini Agop v. Muradca’ya bin üç yüz guruşa sattıkları Husûs-ı âti’z-zikrin mahallinde tahrîri için bi’l-iltimâs irsâl olunan Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da Kızıltaş mahallesinde vâki‘ Mehmed Çelebi’nin menziline varıp zeyl-i kitâbda mastûru’l-esâmi Müslimîn huzûrunda akd-i meclis-i şer‘ etdikde mahalle-i mezbûre kurbünde Şeyh Ferhad mahallesi sükkânından olup kendi kıbelinden asîl ve zevcesi Şahmelek tarafından ikrâr-ı âti’l-beyâna vekîl olup vekâleti mahalle-i mezbûreden Sinan v. Hazar ve Ariton v. Serkiz nâm Ermeniler şehâdetleri ile sâbit olan Nikogos v. Mildon nâm zimmî meclis-i ma‘kūd-ı mezbûrda sâhibü’l-kitâb Agop v. Muradca nâm Ermeni muvâcehesinde ikrâr ve i‘tirâf edip akd-i âtînin sudûruna değin sülüs-i şâyi‘i benim ve sülüsânı yine benim mülk ve hakkım olup mahalle-i mezbûre Şeyh Ferhad mahallesinde vâki‘ bir tarafdan Abdulbâki Çelebi b. Ali mülküne ve bir tarafdan bazen Müezzin Mahmud Çelebi ve bazen Markinos v. Andreyas mülküne ve bir tarafdan bazen Ariton v. Avanis ve bazen Serkiz v. Poyraz mülküne ve bir tarafdan tarîk-ı âmma müntehî olup hâriciyesi iki fevkānî odaları ve bir sofayı ve tahta-pûşu ve bir köşkü ve bir kenîfi ve havlusu ve muhavvata-i dâhiliyyesi iki bâb tahtânî ve fevkānî odayı ve bir fevkānî sofayı ve bir tahtânî sofayı ve odunluğu ve bir su kuyusunu ve bir asmayı ve bir sagīr havluyu ve kenîfi müştemil olan cemî‘ mülk menzilimi kâffe-i hukūk ve merâfıkı ve âmme-i tevâbi‘ ve levâhıkı ile bin üç yüz riyâlî guruşa bey‘ ve teslîm ol dahi iştirâ ve tesellüm edip semen-i merkūmu tamâmen ahz u kabz eyledik dedikde gıbbe’t-tasdîk vâki‘-i hâli mahallinde tahrîr ve ba‘dehû [meclis-i] şer‘a gelip haber vermeğin mâ-vaka‘a [bi’t-taleb] ketb olundu. Fi’l-yevmi’s-sâmin min-Zilhicceti’l-şerîfe li-sene seb‘a ve sittîn ve elf. Şühûdü’l-hâl: Abdünnebi b. Turgud el-imâm, Durmuş Halîfe b. Satılmış, Feridun b. Abdullah, Mustafa Çelebi b. Abdullah, Receb b. Abdullah, Mehmed Çelebi el-kayyûm.