Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 483 Hüküm no: 492 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed Efendi’nin hamamının eski kiracısı Hacı Osman Bey b. Abdurrahman’ın zimmetini ibra ettiği Mahmiye-i İstanbul’da Emin Nureddin mahallesi sâkinelerinden Fâtıma bt. Mehmed Efendi nâm hâtun mahalle-i mezbûrede vâki‘ olup kendi mülkü olan Ovulma Hamamı’nda akd olunan meclis-i şer‘-i hatîrde Sultân Bayezid hamamcısı olup zikrolunan Ovulma Hamamı’nın sâbıkā müste’ciri olan sâhibü hâze’l-kitâb el-Hâc Osman Bey b. Abdurrahman nâm bevvâb-ı sultânî mahzarında tav‘an ikrâr ve i‘tirâf edip hudûdu beynimizde ma‘lûm olup mülk ve hakkım olan işbu hamamı merkūm el-Hâc Osman Bey’e kâffe-i hukūkuyla târih-i kitâbdan ( ) ay mukaddem beher mâh bin ikişer yüz ellişer râyic [fi’l]-vakt akçeye îcâr ve teslîm ol dahi istîcâr ve tesellüm edip ( ) ay tamâmen mutasarrıf olmuşidi el-hâletü hâzihî rızâmız ile merkūm el-Hâc Osman Bey ile akd-i icâre-i mezkûreyi fesh ve işbu hamamı hîn-i akd-i mezbûrda merkūm el-Hâc Osman Bey’e teslîm ettiğim ma‘lûmü’l-cins ve’l-mikdâr hamam esvâbı ile celîl ve hakīr ve kesîr sâir levâzımı ile mutasarrıf olduğu şühûrun icâre-i mezkûreleriyle bana def‘ ü teslîm ben dahi kabz u tesellüm eyledim lâkin mezbûr el-Hâc Osman Bey’e işbu hamamı îcâr ve teslîm ettiğimde hâric-i hamamda mevzû‘ iki istifde cem‘an iki yüz çeki mülk odunum olmağla mezbûr el-Hâc Osman Bey zikrolunan odunumdan elli çeki odunumu benim emr ve iznimsiz işbu hamamım külhanına sarf ve istihlâk etmekle mârrü’z-zikr elli çeki odunumun yevm-i istihlâkinde olan kıymetini merkūm el-Hâc Osman Bey’den taleb ve da‘vâ edip beynimizde nizâ‘-ı küllî vâki‘ olmuşidi el-hâletü hâzihî merkūm el-Hâc Osman Bey’in zimmetini vech-i muharrer üzere istihlâk ettiği odunumun kıymeti da‘vâsından ve târih-i kitâba gelince akd-i mezbûr sebebi ile işbu hamamın esvâbına ve sâir levâzımına müte‘allik âmme-i de‘âvîden ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d mezbûr el-Hâc Osman Bey üzerine işbu hamamın icâre-i meşrûhasına ve zikrolunan elli çeki oduna ve sâir hamam esvâbına ve levâzım-ı ma‘lûmesine müte‘allik bi-vechin minel-vücûh ve sebebin mine’l-esbâb da‘vâ ve hakkım yokdur dedikde mukırre-i mezbûreyi vech-i muharrer üzere cârî ve sâdır olan ikrârında el-mukarru lehü’l-mezbûr dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu cerâ zâlike ve hurrire. Fi’l-yevmi’s-sâlis min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Ahmed Ağa b. Abdülmennân kethüdâ-i hammâmcıyân, el-Hâc Ömer Ağa b. ( ) hamamcı-i Çinili hâlâ, el-Hâc Ömer Çelebi hammâmî-i Aksaray, Karakaş Mustafa Çelebi b. ( ), Ömer Ağa b. Mehmed Nişancı hamamcısı, Osman Bey b. Abdullah İbrahim Paşa hamamcısı, el-Hâc İbrahim nakīb-i hammâmcıyân.