Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 486 Hüküm no: 495 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karati bt. Petre’nin kaybolduğunu iddia ettiği kocası Diyani v. İkşoti’nin donanmada kürekçi olarak istihdam edildiği Galata kazâsında Marmara nâhiyesinde vâki‘ Kalazan nâm karye sâkinelerinden Karati bt. Petre nâm Nasrâniye meclis-i şer‘-i hatîr-i lâzimü’t-tevkīrde karye-i mezbûre sükkânından Halil Beşe b. Abdullah nâm râcil mahzarında üzerine takrîr-i da‘vâ edip merkūm Halil Beşe târih-i kitâbdan elli iki gün mukaddem Marmara nâhiyesinde sâkin olan Dergâh-ı âlî yeniçerileri üzerlerine serdâr olan işbu hâzır bi’l-meclis Zülfikār Çelebi’nin emri ile ba‘de’l-mağrib menzilimi basıp zevcim olan Diyani v. İkşoti nâm zimmîyi ahz edip götürmüşdür ol günden beri zevcim mezbûr Diyani gāib olmuşdur suâl olunsun dedikde gıbbe’s-suâl merkūm Halil Beşe cevâbında işbu sene-i mübârekede Bozcaada önünde vukū‘ bulan muharebede donanma-i hümâyûn kadırgalarının kürekçilerine noksân gelmekle sadr-ı a‘zam bedr-i efham nazımü menâzimi’l-âlem mütemmimü mehâmmi’l-ümem hazretleri tarafından bedel ile nâhiye-i mezbûreden otuz sekiz nefer kürekçi tedârüküne mübâşir olup Dergâh-ı âlî yeniçerileri çavuşlarından olan ( ) emr-i âlî ile geldikde nâhiye-i mezbûre nâibi olan Mevlana Mehmed Efendi b. ( ) zikrolunan otuz sekiz nefer kürekçi bî-bedel cem‘ ve tedârik ve mübâşir-i merkūma teslîm nâhiye-i mezbûre re‘âyâsını rızâları ile beni ta‘yîn etmekle ben dahi merkūmenin zevci mezbûr Diyani’nin menziline varıp mezbûru davet ve rızâsı ile donanma-i [hümâ]yuna gitmişdir hatta mezbûr Diyani’nin minvâl-i muharrer üzere rızâsı ile bedel alıp donanma-i hümâyûna gittiğine hüccet-i şer‘iyyem dahi vardır deyu nâib-i mûmâ-ileyhin imzâsıyla mümzât ve hatemiyle mahtûme hüccet-i şer‘iyye ibrâz edip feth ü kırâat olundukda hâl minvâl-i muharrer üzere olduğu müte‘ayyin ve mütehakkık olmağın merkūme Karati serdâr-ı mezkûr Zülfikār Çelebi ile merkūm Halil Beşe’ye bi-gayri vech-i şer‘î mu‘ârazadan men‘ birle mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâdis min-Zilhicceti’ş-şerîfe li-sene 1067. Şühûdü’l-hâl: Mumcu İslam Beşe b. Şa‘ban, Osman Beşe çukadâr, Süleyman Bey b. Zekeriya ve gayruhüm mine[’l-hâzırîn.]