Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 487 Hüküm no: 496 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’in babasından kendisine intikal eden bozahane aletlerinin yarım hissesini Tanaş v. Marko’ya sattığı Vilâyet-i Rumeli’nde Opar kazâsına tâbi‘ Şinkolaslı nâm karye sakinelerinden Fâtıma bt. Mehmed nâm hâtun tarafından husûs-ı âti’z-zikre vekîl olup mezbûrenin zâtını ma‘rifet-i şeriyye ile ârifân yine karye-i mezbûre sükkânından Mehmed Beşe b. Aydın ve Hasan Beşe b. Hamza nâm kimesneler şehâdetleri ile şer‘an vekâleti sâbite olan Mustafa Beşe b. Abdullah nâm râcil meclis-i şer‘-i hatîr-i lâzimü’t-tevkīrde bozacı tâifesinden işbu râfi‘ü’s-sifr Tanaş v. Marko nâm zimmî muvâcehesinden bi-tav‘ihî ikrâr ve i‘tirâf edip müvekkile-i mezbûrenin babası mezbûr Mehmed’in mülkü ve hakkı olup mahmiye-i İstanbul’da Aksaray çarşısında vâki‘ merhûm Muslihiddin Ağa bozahânesinde olup bozacı âlâtından kırk aded ağaç sini ve altmış boza kovası ve altı fıçı, iki küp ve iki değirmen ve otuz çamçak ve iki yüz kebab şişi ve bir anbar ve sâir bozacı âlâtının nısfı mevlânâ-yı mezbûr Mehmed’in mülkü olup ba‘de vefâtihî hasrân vârisesi olan müvekkilem merkūmeye isâbet ve intikāl eylemişidi hâlâ ben vekâletim hasebiyle âlât-ı merkūmede olan müvekkile-i mezbûrenin nısf hisse-i şer‘iyyesini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Tanaş’a dört bin akçeye bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûr dört bin akçeyi tamâmen mezbûr Tanaş yedinden ahz u kabz eyleyip ve müvekkile-i mezbûre zikrolunan bozahânede olan gedikde nısf hissesini dahi meccânen mezbûr Tanaş’a ferâğat edip kasr-ı yed eyledi ba‘de’l-yevm âlât-ı mezbûr[un] nısfı merkūm Tanaş’ın mülk-i müşterâsı ve mülkümde olan nısf hisselik hakkı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hamis min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Hasan b. Kasım, Sefer b. Mustafa, Mustafa b. Abdullah, Şahin b. Sinan, Sinan b. Ali, Sefer b. Ahmed, Mustafa b. Mehmed, Kara Ali b. Abdullah, Yusuf b. Hamza, Ahmed b. İbrahim, Ali b. Mustafa.