Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 488 Hüküm no: 497 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Yusuf Ağa’nın miras hususunda kardeşleri Ali ve İsmail ile anneleri Rabia’nın zimmetlerini ibra ettiği Mustafa Efendi hazretlerinin imzâlarıyladır. Husûs-ı âtî’l-beyânın mahallinde tahrîri için bi’l-iltimâs kıbel-i şerî‘at-i mergūbeden irsâl olunan Mevlana Şeyhzâde Mustafa Efendi mahmiye-i İstanbul’da Debbâğ Yunus mahallesinde Râbia Hâtun bt. el-Hâc Ali’nin sâkine olduğu menzile varıp zeyl-i sahîfede isimleri mastûr Müslimîn huzûrlarında akd-i meclis-i şerîf eyledikde mahalle-i mezbûrede sâkin iken fevt olan Ahmed Bey b. Süleyman’ın verâseti zevce-i metrûkesi mezbûre Rabia’ya ve sulbî oğulları Ali ve Kadri ve İsmail mahzarında olup kable’l-kısme mezbûr Kadri dahi fevt olup verâseti vâlidesi merkūme Râbia’ya ve li-ebeveyn er karındaşı mezbûrân Ali ve İsmail’e ve li-üm sagīre kız karındaşı Hadice bt. Yusuf Ağa’ya münhasıra olduğu şer‘an mütehakkık oldukdan sonra sagīre-i merkūme Hadice’nin babası ve velisi olan mezbûr Yusuf Ağa b. Abdullah meclis-i ma‘kūd-ı mezkûrda tereke-i müteveffâ-yı mezbûre vâzı‘ü’l-yed olan mezbûrûn Ali ve İsmail ve Râbia mahzarlarında bi’l-vekâle ikrâr ve i‘tirâf edip müteveffâ-yı mezbûrun akār ve menkūl ve nukūd ve evânî-i sîm ve esâs-ı beyt ve evânî-i nuhâsiyye ve gayr-ı nuhâsiyye ve bi’l-cümle ism-i mâl ıtlâk olunur cemî‘ terekesinden bi-hükmi’l-münâsahati’ş-şer‘iyye kızım sagīre-i mezbûre Hadice’ye isâbet eden hisse-i şer‘iyyesini tamâmen yedlerinden velâyet-i mahkiyem hasebiyle ahz u kabz eyledim min ba‘d tereke-i müteveffâ-yı mezbûrda vechen mine’l-vücûh ve sebeben mine’l-esbâb sagīre-i mezbûre Hadice’nin bir akçe ve bir habbe hakkı bâkī kalmadı dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip ma‘an ba‘s olan Ahmed Çelebi ile alâ vukū‘ihî inhâ etmeğin mâ-vaka‘a bi’t-taleb ketb olundu. Fî evâsıtı Zilka‘deti’ş-şerîfe li-sene seb‘a ve sittîn ve elf. Şühûdü’l-hâl: Abdullah Efendi b. Mehmed el-imâm, Seyyid Ali Çelebi b. Mustafa, Mehmed Çelebi b. Mehmed, Ali Beşe b. Abdullah, Serrâc Süleyman Çelebi b. Halil, Yusuf Efendi b. Veli el-müderris, Ali Efendi b. Mehmed el-müezzin, Mustafa Beşe b. Mehmed er-râcil, Mustafa b. Şa‘ban, Mehmed Çelebi b. Mustafa, Mehmed Çelebi b. İsmail, Mehmed Çelebi b. Abdullah ve gayruhüm.