Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 489 Hüküm no: 498 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hamid’in kocası Mustafa Efendi’den kendisine intikal eden alacağı Hacı Abbas Efendi b. Mahmud’dan tahsil edip zimmetini ibra ettiği Mahmiye-i İstanbul’da Haraçcı Muhyiddin mahallesi sâkinlerinden olup bundan esbak vefât eden Mustafa Efendi b. Hasan’ın verâseti zevce-i metrûkesi Âişe bt. Hâmid nâm hâtun ile sulbiye sagīre kızı Havvâ’ya münhasıra olup ba‘dehû mezbûr Havvâ dahi fevt olup verâseti ancak vâlidesi mezbûre Âişe Hâtun’a münhasıra olduğu şer‘an zâhir ve müte‘ayyin oldukdan sonra mezbûre Âişe tarafından husûs-ı âtî’l-beyânı da‘vâ ve taleb ve ahz u kabza ve lâzım gelirsi sulha vekîl olup mezbûrun zâtını ma‘rifet-i şer‘iyye ile ârifân olan Hüseyin Efendi b. Mustafa ve Halil Çavuş b. İbrahim şehâdetleri ile şer‘an vekâleti sâbite olan Ahmed Efendi b. Ali meclis-i şer‘-i hatîr-i lâzimü’t-tevkīrde zümre-i kuzâtdan el-Hâc Abbas Efendi b. Mahmud mahzarında bi’l-vekâle tav‘an ikrâr ve i‘tirâf edip mezbûr el-Hâc Abbas Efendi bundan akdem müteveffâ-yı mezbûrdan hâl-i sıhhatinde yüz kıt‘a riyâlî guruş iktiraz ve kabz eyledikde meblağ-ı mezbûrdan elli riyâlî guruşuna işbu hâzır bi’l-meclis Hüseyin Efendi kefîl olmağla bi-hükmi’l-kefâlet zimmetine edâsı lâzım gelen meblağ-ı mezbûr da‘vâsından mezbûr Hüseyin Efendi müvekkile-i mezbûre ile otuz riyâlî guruşa sulh olup müvekkile-i mezbûre dahi sulh-ı mezbûru kabûl ve bedel-i sulh-ı mezbûru meclis-i sulhda yedinden tamâmen ahz u kabz edip meblağ-ı bâkī elli riyâlî guruşu mezbûr Hâcı Abbas Efendi’den taleb ve da‘vâ eylediğinde beynlerine muslihûn tavassut edip mezbûr el-Hâc Abbas Efendi ile da‘vâ-yı mezkûreden müvekkile-i mezbûreyi otuz kıt‘a riyâlî guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru merkūm el-Hâc Abbas Efendi yedinden vekâletim hasebiyle tamâmen ahz u kabz edip husûs-ı mezbûra müte‘allik da‘vâdan mezbûr el-Hâc Abbas Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt edip min ba‘d mezbûr el-Hâc Abbas Efendi ile müvekkile-i mezbûrenin vechen mine’l-vücûh da‘vâ ve hakkı kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene seb‘a ve sittîn ve elf. Şuhudu’l-hâl: Mehmed Efendi b. Veli Efendi, Ahmed Efendi el-kâtib, Mustafa Efendi b. Muharrem, Osman Beşe çukadâr ve gayruhüm mine[’l-hâzırîn.]