Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 490 Hüküm no: 499 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hatun Vakfı’na ait boş arsanın Ahmed Efendi b. Kemaleddin’e kiralandığı Mahmiye-i İstanbul’da Sultân Selim Han Câmi‘-i şerîfi kurbünde Cebecibaşı mahallesinde vâki‘ merhûm İsmihan Hâtun Vakfı’na mütevellî olan Şa‘ban b. Abdullah meclis-i şer‘-i hâtır-i lâzimü’t-tevkīrde işbu râfi‘ü’l-vesîka mefharü’l-kuzât Ahmed Efendi b. Kemaleddin mahzarında bi’t-tevliye ikrâr ve takrîr-i kelâm edip merhûm-ı mezbûrun mahalle-i mezbûrede vâki‘ meşrûtam olan vakıf odalar mürûr-ı eyyâm ile harâba müşrif olup kābil-i süknâ ve intifâ‘ olmayıp ve imâret ve meremmetine cânib-i vakf-ı mezbûrda müsâ‘ade olmayıp bir müddet dahi hâli üzere kaldığı takdîrce bi’l-külliyye münhedim olmak mukarrer olmağın vakf-ı mezbûrdan olup bir tarafı mezbûr Ahmed Efendi mülküne ve üç tarafı vakf-ı mezbûrun arsa-i hâliyesine müntehî olup tûlen on buçuk ve arzan dört zirâ‘ be-hesâb-ı şatrancî kırk iki zirâ‘ arsa-i hâliye icâre-i mu‘accele ve bir mikdâr ücret-i müeccele ile îcâr olun mu‘accelesi ile zikrolunan odaları binâ ve imâret olunmak cânib-i vakfa evlâ ve enfa‘ olmağla zikrolunan arsa-i hâliyeye kırk guruş icâre-i mu‘accele ve senede altmışar akçe mukāta‘a ile mezbûr Ahmed Efendi istîcâra tâlib olup vech-i muharrer üzere îcâr cânib-i vakf-ı mezbûra enfa‘ olmağla ben dahi taraf-ı şer‘den me’zûnen minvâl-i muharrer üzere arsa-i mezbûreyi kırk guruş ücret-i mu‘accele ve senede altmışar akçe mukāta‘a ile mezbûr Ahmed Efendi’ye îcâr ve teslîm ol dahi vech-i muharrer üzere istîcâr ve tesellüm eyledi dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Hasan Efendi el-Kādî bi-İznik, Ahmed Efendi eş-şehîr bi-Câbîzâde, Mustafa Efendi eş-şehîr bi-Bostânîzâde, Ahmed Efendi el-müezzin, Mehmed Ağa b. Hasan Ağa, Derviş Ağa serdâr, el-Hâc Yusuf el-müezzin, Ahmed Bey b. Muharrem.