Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 586 Hüküm no: 611 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lişîzâde Ali Efendi’nin Varna’da haksız yere zaptettiği Seyyid Mehmed Efendi Vakfı’na ait değirmeni adı geçen vakfa teslim etmesine karar verildiği Vilâyet-i Rumeli’nde medîne-i Varna’da es-Seyyid Mehmed Efendi Vakfı’na bi’l-fi‘il mütevellî olan Hasan Efendi b. Şa‘ban mahmiye-i Edirne’de Dîvân-ı Hümâyûn’da ma‘kūd mahfil-i kazâda zikri âtî değirmene vâzı‘u’l-yed olan Lişîzâde Ali Efendi mahzarında üzerine takrîr-i da‘vâ edip mezbûr Ali Efendi medîne-i mezbûrede kādı iken vakf-ı mezbûrdan olup medîne-i mezbûre musallâsı kurbünde Nehr-i Devnya? ile dâir vakf-ı mezbûra intimâ ile tahdîd ve tavsîfden müstağnî bir değirmenci odası ve mukābilesinde bostan yeri ve bahçeyi müştemil iki göz âsiyâb icâre-i mu‘accele-i ma‘lûme ve senede altı bin akçe icâre-i müeccele ile mutasarrıfı olan Memiş Odabaşı bin altmış iki senesi evâhirinde bilâ-veled fevt olmakla cânib-i vakfa âid olmuşiken mezbûr Ali Efendi zikrolunan âsiyâbı beş senedir bi-gayrı hakkın zabt ve tasarruf eder suâl olunup kasr-ı yedine ve vakıf için bana teslîme mezbûr Ali Efendi’ye tenbîh olunmak taleb ederin dedikde gıbbe’s-suâl mezbûr Ali Efendi cevâbında fi’l-hakīka mezbûr âsiyâb vech-i meşrûh üzere cânib-i vakfa âid olup lâkin harâb ve mâil-i türâb olduğu ecilden ve vech-i muharrer üzere ücreteyn-i ma‘hûdeteyn ile istîcâra kimesne râgıb olmamağla hâlî ve mu‘attal kalıp târih-i mezbûrda vakf-ı mezbûrun mütevellîsi olan Mustafa Efendi zikrolunan âsiyâbı noksân semen-i ma‘lûm-ı makbûza bana bi’t-tevliye bey‘ ve ocağını icâre-i ma‘lûme ile îcâr ben dahi istîcâr etmekle beş senedir hakk-ı zabt u tasarruf ederin deyu def‘le mukābile edicek gıbbe’l-istintâk mütevellî-i mezbûr Hasan Efendi husûs-ı mezbûru bi’l-külliye inkâr etmeğin [93a] mezbûr Ali Efendi’den def‘-i mezkûrunu mübeyyin beyyine taleb olundukda ityân-ı beyyineye bir vechile kudreti olmayıp ve mütevellî-i mezbûra dahi yemîn teveccüh etmekle zikrolunan âsiyâbdan kasr-ı yed edip mütevellî-i mezbûra mahallinde teslîme mezbûr Ali Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’t-tâsi‘ aşer min şehri Rebî‘i’l-evvel li-sene semân ve sittîn ve elf. Şühûdü’l-hâl: Ali Efendi el-kādî-i Şumnu sâbıkā, Mustafa Efendi el-Kādî bi-Eskicuma muvakkaten, Ali Efendi Şişkozâde, Mustafa b. Ramazan el-kayyûm, Ahmed b. Sefer el-müezzin, Mustafa Efendi b. Mehmed, Mehmed b. Abdullah, İvaz Ağa ser-muhzırân, Mustafa Çelebi b. ( ).