Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 597 Hüküm no: 623 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Kasım Gönânî mahallesindeki vakıf menzilin Mahmud Efendi’ye tahsis olunduğu Mahmiye-i İstanbul’da Sultanhamamı kurbünde Hoca Kasım Gönanî mahallesinde ( ) nâm sâhibetü’l-hayr vakıf edip süknâsını ulemâdan süknâya muhtâc bir kimesneye şart ve ta‘yîn eylediği mahalle-i mezbûrede vâki‘ iki tarafdan el-Hâc Beşir mülkü ve bir tarafdan Aynî Hâtun bt. Hasan Beşe mülkü ve bir tarafdan tarîk-ı âm ile mahdûd bir şehnişînli oda ve yanında bir oda ve bir kahve odasını müştemil vakıf menzil şart-ı vâkıfe üzere mutasarrıf olan İsmail Efendi fevt olmağın menzil-i mevkūf-ı mezbûre şart-ı vâkıfe üzere ulemâdan olup süknâya eşedd-i ihtiyacı olan müteveffâ-yı mezbûrun karındaşı işbu râfi‘ü’l-kitâb Mahmud Efendi’ye kıbel-i şer‘den tevcîh olunup mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene semân ve sittîn ve elf. Şühûdü’l-hâl: Beyzâde Mehmed Efendi el-kādî, Mahmud Çelebi b. Mustafa, es-Seyyid Mustafa Çelebi b. Abdullah, el-Hâc Ca‘fer b. Abdullah.