Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 598 Hüküm no: 624 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Mehmed’in merhum Bayram Paşa’nın hem kız kardeşi hem de merhumun terekesinde hak sahibi olduğunu ispat ettiği Vilâyet-i Anadolu’da medîne-i Tokat’da sâkin olup Aydın sancağına mutasarrıf iken fevt olan Bayram Paşa’nın li-ebeveyn hemşîresi olduğunu iddiâ eden Sâliha Hâtun bt. Mehmed tarafından da‘vâ-yı âtiyetü’z-zikre vekîl olup Mehmed Bey b. Ömer ve Ali Bey b. Murad şehâdetleriyle şer‘an vekâleti sâbite olan zevci Muzaffer Bey b. Maksûd mahmiye-i Edirne’de mahfil-i kazâda zâhirde vâris-i ma‘rûfu olmamak üzere müteveffâ-yı mezbûrun muhallefâtına vâzı‘u’l-yed olan bi’l-fi‘il atebe-i aliyye-i sultaniyyede başdefterdârlık hizmeti şerefiyle müşerref olan câmi‘u’l-emvâli’s-sultaniyye hâfızu’l-hazâini’l-Osmaniyye İbrahim Paşa hazretleri taraf-ı karînü’ş-şereflerinde husûs-ı câ’î için husûmet ve redd-i cevâba sâbitü’l-vekâle vekîl olan Ali Çavuş b. Mustafa mahzarında bi’l-vekâle üzerine herbiri da‘vâ edip müteveffâ-yı mezbûr Bayram Paşa hâl-i hayatında müvekkilem mezbûre Sâliha Hâtun li-ebeveyn kız karındaşı olduğunu bi’d-defe‘ât ikrâr edip ve ikrâr-ı mezbûru üzere musırran fevt olmağın müvekkilem mezbûre Sâliha müteveffâ-yı mezbûrun mukarrun-leh bi’n-neseb cihetinden veresesi olup mezbûrun verâseti mezbûre Sâliha ile zevce-i metrûkesi Akça Hânım’a münhasıra olmağın muhallefâtından kendüye âid olan hisse-i şer‘iyyesin muhallefâtına vâzı‘u’l-yed olan müvekkil-i müşârun-ileyh paşa hazretlerinden bi’l-vekâle taleb ederin vekîl-i mezbûrdan suâl olunsun dedikde gıbbe’s-suâl mezbûr Ali Çavuş cevâbında müvekkili paşa-yı müşârun-ileyhin muhallefât-ı mezbûreye vâzı‘u’l-yed olduğunu ikrâr lâkin mezbûre Sâliha’nın vech-i mübeyyen üzere verâsetini inkâr eder deyicek vekîl-i mezbûrdan müdde‘âsını mübeyyine beyyine taleb olundukda udûl-i ricâlden medîne-i mezbûre sükkânından Mustafa Bey b. Mehmed ve Ali Bey b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Bayram Paşa hâl-i hayatında vech-i muharrer üzere müvekkile-i mezbûre için li-ebeveyn kız karındaşımdır deyu bi’d-defe‘ât bizim huzûrumuzda ikrâr edip ve ikrâr-ı mezkûr üzere musırran fevt olup mezbûre Sâliha müteveffâ-yı merkūmun mukarrun-leh bi’n-neseb cihetinden vârisidir verâseti merkūme Sâliha ile zevcesi Akça Hânım’a münhasıradır ve mezbûretândan gayrı vârisi ve terekesine müstahıkkı olduğu ma‘lûmumuz değildir biz bu husûsa şâhidleriz şehâdet dahi ederiz deyu herbiri edâ-i şehâdet-i şeriyye eylediklerinde ba‘de’t-ta‘dîl şehâdetleri makbûle oldukdan sonra mûcibiyle mezbûre Sâliha’nın verasetine ba‘de’l-hüküm mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: Abdi Ağa b. ( ), Ali Efendi b. ( ), Mustafa Efendi, Şeyhzâde Ahmed, Ahmed Ağa b. ( ), İbrahim b. Ahmed.