Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 599 Hüküm no: 625 Orijinal metin no: [95a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne’nin Ayastefano mahallesinde oturan Hıristo v. Dimo’un çakırcı olup haraç vergisi yükümlülüğünün bulunmadığı Mahmiye-i Edirne’de Ayastefano mahallesi keferesi ahâlîsinden Yanaki v. Yorgi ve Panayot v. Yani ve Londo v. Yuvan nâm zimmîler kendi taraflarından asâleten ve sâir ahâlî-i mahalle-i mezbûre taraflarından da‘vâ-yı âtiyeti’z-zikre vekîl olup vekâletleri nehc-i şer‘î üzere sâbit oldukdan sonra vekâleten mahmiye-i Edirne’de mahfil-i kazâda fi’l-asl nefs-i Argirikasrı kasabasından olup hâlâ mahalle-i mezbûrede sâkin Hıristo v. Dimo nâm zimmî muvâcehesinde herbiri bi’l-asâle ve’l-vekâle üzerine takrîr-i da‘vâ edip mezbûr Hıristo altı seneden beri mahallemizde sâkin olup târih-i kitâba gelinceye senede üzerimize lâzım gelen harâcını bi’d-defe‘ât edâdan imtinâ‘ eder suâl olunup işbu senede bizimle ma‘an harâc vermeğe tenbîh olunmak matlûbumuzdur dediklerinde gıbbe’s-suâl mezbûr Hıristo cevâbında fi’l-vâki‘ altı seneden beri mahalle-i mezbûrede sâkinim lâkin yedimde olan berât-ı âlîşân ve sûret-i defter nâtık olduğu üzere eben an-ceddin çakırcı oğlu çakırcı olmağın lâzım gelen rüsûmu senede çakırcıbaşıya edâ ederin deyu tuğrâ-i sultanî ile mu‘anven berât-ı şerîf ve sûret-i defter ibrâz edip alâ vechi’l-hasm feth ve kırâat olundukda mazmûnu min külli’l-vücûh takrîrine mutâbık olup çakırcı olduğu mukarrer ve sûret-i defterde babası ve dedesi isimleri mastûr ve mukayyed bulunmağın müdde‘iyyûn-ı mezbûrûn merkūm Hıristo’ya mu‘ârazadan men‘ olunup mâ-vaka‘a ketb olundu. Fi’t-târihi’l-mezbûr. Şühûdü’l-hâl: İvaz Ağa muhzırbaşı, Ali Beşe çukadâr, İbrahim Bey. Abdurrahman Bey.