Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 603 Hüküm no: 628 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Abdurrahman’ın Belgrat’taki bazı emlakını haksız yere zaptettiği iddiasıyla Kapudanzâde Mehmed Efendi b. Ömer Ağa aleyhine açtığı davada dört yüz guruşa sulh olup zimmetini ibra ettiği Fi’l-asl medîne-i Belgrad’da Bayram Bey mahallesinden olup hâlâ mahmiye-i İstanbul’da Ayasofya-i sagīre mahallesinde sâkine Râbia bt. Abdurrahman nâm hâtun meclis-i şer‘de medîne-i mezbûre müftüsü Kapudanzâde Mehmed Efendi b. Ömer Ağa mahzarında ikrâr ve i‘tirâf edip silk-i mülkümde münselik olup medîne-i mezbûrede İmaret mahallesinde vâki‘ bir tarafı Hâcı Mehmed veresesi ve bir tarafı Hâcı Mustafa veresesi mülkleri ve bir tarafı İmaret câmi‘ine ve bir tarafı tarîk-ı âmma müntehî olup arsasının ayda Dedezâde Vakfı’na seksen beş akçe mukāta‘ası olan sakf-ı vâhid altında bir bâb helvacı ve bir bâb kürkçü ve bir bâb ekmekçi ve üç kepenk sagīr eskici dükkanlarımı ve yine mülküm olup arsasının senede Bayram Bey Vakfı’na ikişer yüz akçe mukāta‘ası olan medîne-i mezbûrede mezbûr Mehmed Efendi’nin menzili hizâsında vâki‘ sakf-ı vâhid altında yedi bâb mülk dükkanlarımı mezbûr Mehmed Efendi medîne-i mezbûreden nakl edip Ayasofya-i sagīr mahallesinde tavattun etmekle fuzûlen zabt u tasarruf eder deyu da‘vâ ve taleb eylediğimde ol dahi cevâbında zikrolunan dekâkîninin İskender Beyzâde el-Hâc İbrahim Vakfı’na olan dört yüz altmış kıt‘a riyâlî guruş ve İbrahim Çelebi’ye olan yirmi altı bin akçe deynlerin mukābilesinde rehin olmakla zikrolunan dekâkîni semen-i misilleriyle bey‘a ve semenlerinden deyn-i mezkûreyi edâya ve fazlasını zabta tarafından azl ve in‘izâlden masûne vekâlet-i devriyye ile vekîllerin olan el-Hâc Durak b. Memi ve İmâm Mustafa Efendi b. Ahmed nâm kimesneler ba‘de arzi’t-tâlibîn izn-i hâkimü’ş-şer‘le semen-i misli olan yüz yedi bin beş yüz akçeyi vekâletleri hasebiyle bana bey‘ ve teslîm ben dahi iştirâ ve kabz edip semen-i mezbûru yedimden tamâmen ahz u istîfâ ve ba‘dehû semen-i mezbûreden deyn-i merkūmu edâ ve îfâ edip fazlası hâlâ yedlerindedir deyicek beynimizde münâza‘ât-ı kesîre vukū‘undan sonra vesâtet-i muslihîn da‘vâ-yı mezbûreden işbu Mehmed Efendi ile dört yüz kıt‘a esedî guruşa inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört yüz esedî guruşu meclis-i sulhda yedinden tamâmen ahz u kabz edip ba‘de’l-yevm zikrolunan dükkânlara ve ücretlerine müte‘allika olan cemî‘ de‘âvî ve mutâlebat ve eymân ve muhâsamâtdan zimmetini ibrâ-i âm ile ibrâ edip min ba‘d benim için mezbûr Mehmed Efendi kıbelinde hak ve alâkam bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Şevval sene [10]67. Şühûdü’l-hâl: Ebûbekir Efendi b. Ahmed el-kādî, Mehmed Ağa b. Ahmed, Ahmed Çavuş b. Mehmed, İsmail Bey b. ( ), Receb Bey b. Nasuh, Şeyhzâde Abdüsselâm Çelebi, Yazıcızâde Mehmed Çelebi.