Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 604 Hüküm no: 629 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Androva’nın ölen Niko’nun varisi olmadığını varisleri huzurunda ikrar ettiği Mahmiye-i Edirne hısnı dâhilinde Hıristos mahallesinde sâkin iken bundan akdem hâlik olan Niko’nun li-ebeveyn karındaşı Papa Yani’nin sulbî oğlu Adam nâm zimmînin sulbiye kızları Boherya ve Zanbak ve Bahorya nâm sagīrâtın tesviye-i emrlerine kıbel-i şer‘den mansûbe vasîleri olan Prepine nâm Nasrâniye mahmiye-i mezbûrede mahfil-i kazâda Mihal v. Androva nâm zimmî muvâcehesinde üzerine takrîr-i da‘vâ edip mezbûr Mihal bundan akdem hâlik-i merkūm Niko’nun ben dahi vârisiyim deyu muvâcehemde bin altmış yedi senesi Zilhiccesi’nin yirmi üçüncü gününde medîne-i mezbûrede Suğrâ Mahkemesi’nde nâibü’ş-şer‘ olan Mevlânâ Nuh Efendi huzûrunda hâlik-i merkūmun terekesine vaz‘-ı yed murâd edip taleb ve da‘vâ ettikden sonra mevlânâ-yı mezbûr huzûrunda vech-i muharrer üzere kendi verâsetini isbâtdan âciz olduğundan gayrı sagīrât-ı merkūmâtın vech-i meşrûh üzere verâsetlerini ikrâr ve i‘tirâf etmeğin nâib-i mezbûr ikrâr-ı mezkûrunu ba‘de’t-tahrîr yedime hüccet-i şer‘iyye verip mezbûr Mihal’i mu‘ârazadan men‘ etmişiken hâlâ yine da‘vâ sadedinde olup mu‘ârazadan hâlî değildir deyu târih-i mezbûr ile müverraha ve nâib-i mezbûrun imzâsıyla mümzât ve hatemiyle mahtûme ve mazmûnu min külli’l-vücûh takrîr-i meşrûhuna mutâbık hüccet-i şer‘iyye ibrâz edip alâ vechi’l-hasm feth ve kırâat ve istintâk olundukda mezbûr Mihal mazmûn-ı hüccet-i mezbûreyi mukırr u mu‘terif olup bir vechile verâsetini isbâta kādir olmamağın min ba‘d mu‘ârazadan men‘ olunup mâ-vaka‘a bi’t-taleb ketb olundu Fi’l-yevmi’s-sâbi‘ min şehri Rebî‘i’l-âhir li-sene semân ve sittîn ve elf. Şühûdü’l-hâl: Şahin Çavuş b. Ahmed el-mübâşir, İbrahim Bey el-emin, Abdurrahman Bey, el-Hâc Hüseyin el-cündi.