Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 613 Hüküm no: 642 Orijinal metin no: [98a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Seyisler Mukaddemi Hacı Ahmed’in yerine Ahmed b. Fayet’in tayin olunduğu Mahmiye-i İstanbul’da seyis tâifesinin mukaddemlerinden Ahmed b. Mansur ve İsa b. Mehmed ve Mansur b. Abdullah ve Ahmed Seravulî ve Mehmed Ebûifrît ve Mehmed Gavâşe ve Mehmed Enbâyî ve sâirleri mahrûse-i Edirne’de meclis-i şer‘-i hatîrde herbiri takrîr-i kelâm edip tâife-i mezbûre üzerlerine bizim ile ma‘an mukaddem olan Hâcı Ahmed fevt olup yeri mahlûl olmağın işbu bâ‘isü’l-kitâb diğer Ahmed b. Fayet nâm kimesne mahall ü müstahık olmakla zikrolunan mukaddemlik taraf-ı saltanat-ı aliyyeden mezbûr Ahmed’e tevcîh ve yedine berât-ı şerîf-i âlîşân verilmişdir nazar olunup mûcebince kıbel-i şer‘-i mutahhardan yedine hüccet-i şer‘iyye verilmek matlûbumuzdur deyu tuğrâ-yı sultanî ile mu‘anven ve târih-i kitâb senesi şehr-i Rebî‘ülâhiri evâsıtıyla müverrah berât-ı şerîf ibrâz edip nazar olundukda mazmûn-ı münîfi takrîr-i meşrûhlarına muvâfık bulunmağın mûcebince savb-ı şer‘den işbu vesîka alâ mâ-hüve’l-hakīka ketb olunup yedlerine vaz‘ olundu. Hurrire fi’l-yevmi’s-sâmin-Cumâdelûlâ li’s-seneti’l-mezbûre Şühûdü’l-hâl: İvaz Ağa b. ( ), Abdüllatif Çelebi b. ( ), el-Hâc Hüseyin, Abdurrahman Bey b. ( ) el-cündi.