Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 613 Hüküm no: 643 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Karabet v. Hoçuk’un ortağı Hogaz v. Beki’de kardeşi iki bin beş yüz akçe alacağı olduğu Habbâz tâifesinden işbu hâmilü’l-kitâb Karabet v. Hoçuk nâm Ermeni mahmiye-i Edirne’de mahfil-i kazada tâife-i mezbûreden Hogaz v. Beki muvâcehesinde üzerine takrîr-i da‘vâ edip sene-i sabıkada ben ve mezbûr Hogaz ve gâib ani’l-meclis karındaşım Arakir nâm Ermeni Ordu-yı Hümâyûn ile Boğazhisarı’nda habbâzlık san‘atında şerîki olup ba‘dehû fesh-i akd-i şirket edip hesâb eylediğimizde ba‘de küllî hesâb karındaşım gâib-i mezbûrun hissesine isâbet eden hakkından mezbûr Hogaz zimmetinde iki bin beş yüz akçe zuhûr etmeğin mezbûr Arakir meblağ-ı mezbûru medîne-i Gelibolu’da mezbûr Hogaz’dan üçümüz bir yerde iken bana havâle-i sahîha-i şer‘iyye ile havâle edip ol dahi havâle-i mezbûreyi kabûl eylemişidi hâlâ meblağ-ı mezbûru merkūm Hogaz’dan taleb eylediğimde vermede te‘allül eder suâl olunup alıverilmek matlûbumdur dedikde gıbbe’s-suâl mezbûr Hogaz cevâbında havâle-i mezbûreyi bi’l-külliyye inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden olup bi’l-fi‘il atebe-i aliyyede başdefterdâr olan İbrahim Paşa hazretlerinin imâmlarından Mahmud b. Himmet ve Pehlivan Osman b. Süleyman meclis-i şer‘a li-ecli’ş-şehâde hazırân olup isre’l-istişhadi’ş-şer‘î fi’l-vâki‘ gâib-i mezbûr Arakir’in mâl-ı şirketden mezbûr Hogaz zimmetinde iki bin beş yüz akçe hakkı olduğunu mezbûr Hogaz ikrâr eyledikden sonra gâib-i mezbûr meblağ-ı mersûmu merkūm Hogaz’dan karındaşı müdde‘î-i mezbûr Karabet’e bizim huzûrumuzda havâle edip ol dahi havâle-i mezkûreyi kabûl eyledi biz bu husûsa şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde şâhidân-ı mezbûrân ta‘dîl ve tezkiye olunduklarından sonra şehâdetleri makbûle olmağın mûcebince ba‘de’l-hüküm mâ-vaka‘a bi’t-taleb ketb olundu Fi’l-yevmi’r-râbi‘ min-Cumâdelûlâ li-seneti’l-mezbûre. Şühûdü’l-hâl: Mustafa Çavuş el-mübâşir, el-Hâc Hüseyin el-cündi, İbrahim Bey b. Ömer, Abdurrahman Bey b. ( ), Salih b. ( ).