Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 614 Hüküm no: 644 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey ve İbrahim Bey’in Kebir Mehmed Çelebi Vakfı’nın tevliyeti hususunda çıkan anlaşmazlıkta Paşazâde Ahmed Ağa b. Abdulbâki ile sulh oldukları Fi’l-asl Vilâyet-i Rumeli’nden Kalkandelen kasabası sükkânından olup Dimetoka nâm kasabada mutavattın iken bundan akdem vefât eden Mehmed Efendi b. Hüseyin’in sulbî kebîr oğulları Mustafa Bey ve İbrahim Bey mahmiye-i Edirne’de mahfil-i kazâda medîne-i Üsküb sükkânından Paşazâde demekle ma‘rûf mefharü’l-emâcid ve’l-a‘yân Ahmed Ağa b. Abdulbâki mahzarında her biri ikrâr ve takrîr-i kelâm edip merhûm Kebîr Mehmed Çelebi’nin zikrolunan Kalkandelen kasabasında vâki‘ câmi‘-i şerîf ve imâret ve hamam ve bunlardan gayrı evkāfının tevliyeti ebnâsının eslahına ba‘dehüm ebna-i ebnâsının eslahına ve ba‘de’l-inkırâz utekāsının eslahına ba‘dehû ebna-i utekāsının eslahına meşrûta olup vakıf-ı mezbûrun ebnâsı ve utekāsı münkariz olmağın biz ebnâ-i utekādan olduğumuz hasebiyle târih-i kitâbdan bir sene mukaddem tevliyet-i mezbûreyi şart-ı vakıf üzere berât ettirip ale’l-iştirâk zabt ve tasarruf eylediğimizden sonra mezbûr Ahmed Ağa ben vâkıf-ı mezbûrun ebnâ-i ebnâsından olup sizden mukaddemim deyu bizimle da‘vâ sadedinde olup beynimizde münâza‘ât-ı kesîre vâkı‘a olmuşidi hâlâ mezbûr Ahmed Ağa bize ihrâc ettiğimiz berât harcı ve zihâb ve iyâbımızda kendi masârıfımız için kendi malından teberru‘an beş yüz kıt‘a riyâlî guruş def‘ ve teslîm biz dahi ahz u kabz edip ba‘de’l-yevm tevliyet-i mezbûreden herbirimiz kasr-ı yed edip min ba‘d tevliyet-i mezbûreye müte‘allik mezbûr Ahmed Ağa ile vechen mine’l-vücûh da‘vâ ve niza‘ımız kalmadı dediklerinde mezbûr Ahmed Ağa dahi meblağ-ı mezbûr beş yüz guruşu mezbûrân Mustafa Bey ve İbrahim Bey’e berâtları ve zihâb ü iyâbları harc ve sarfı için teberru‘an kendi malından verip min ba‘d mezbûrân ile tevliyet-i mezbûre ve gayra müte‘allik bi-vechin mine’l-vücûh ve sebebin mine’l-esbâb da‘vâ ve nizâ‘ım yokdur dedikde ggıbbe’t-tesâdukı’ş-şer‘î mâ-vaka‘a bi’t-taleb ketb olundu. Hurrire fi’l Cumâdelûlâ li-sene semân ve sittîn ve elf. Şühûdü’l-hâl: Mefharü erbâbi’t-tahrîr ve’l-kalem Mustafa Efendi b. Yusuf başmukābeleci, Mefharü erbâbi’l-kalem İbrahim Efendi halîfe-i mukābele, Hüseyin Ağa b. Abdülmennan, Yusuf Ağa b. Mehmed, Abdullah Çelebi b. Ahmed, Hasan Çelebi b. Abdullah, Ali Çelebi b. Mehmed kethüdâ, Ahmed Efendi [b.] Mehmed el-müderris.