Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 622 Hüküm no: 655 Orijinal metin no: [100a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçibaşı Mehmed Ağa’nın Müderris Feyzullah Efendi’ye sekiz yüz guruş borcu olduğunu ikrar ettiği Husûs-ı âti’l-beyânı mahallinde tahrîr için bi’l-iltimâs kıbel-i şerî‘at-i mergūbeden irsâl olunan Şeyhzâde Mustafa Efendi mahrûse-i Edirne’de merhûm ve mağfûrun-leh Sultân Selim Hân Medresesi müderrisi olan kıdvetü’l-müderrisîni’l-fihâm İlâhîzâde Mehmed Efendi’nin merhûm-ı mezbûr câmi‘-i şerîfi kurbünde sâkin olduğu menziline varıp zeyl-i sahîfede muharrerü’l-esâmi olan Müslimîn huzûrunda akd-i meclis-i şer‘-i şerîf eylediğinde mahmiye-i İstanbul’da Ayasofya-i kebîr mahallesi sükkânından olup sâbıkā hâssa ekmekçibaşı olan umdetü’l-emâsil ve’l-a‘yân Mehmed Ağa b. Receb meclis-i ma‘kūd-ı mezbûrda işbu sâhibü’l-kitâb zahrü’l-müderrisîni’l-kirâm Feyzullah Efendi b. Veliyyüdin mahzarında ikrâr-ı tâm ve takrîr-i kelâm edip mezbûr Feyzullah Efendi kendi malından bana sekiz yüz kıt‘a riyâlî guruş-ı kebîr ikrâz ve teslîm ben dahi istikrâz ve kabz edip hâlâ meblağ-ı mezbûr sekiz yüz kıt‘a riyâlî guruş zimmetimde mezbûr Feyzullah Efendi’ye lâzimü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan İsa b. Ahmed ve Ahmed b. Mahmud ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: es-Sâbıkūn.