Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 623 Hüküm no: 656 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Receb’in Varna kazasına bağlı Kalata köyünden bazı zimmilere yüz bin akçe borç verdiği Vilâyet-i Rumeli’nden Prevadi kazâsına tâbi‘ Sarıhızır nâm karye sükkânından hâfızu hâze’l-kitâb fahrü’l-akrân Mehmed Ağa b. Receb mahmiye-i Edirne’de meclis-i şer‘-i şerîfde vilâyet-i mezbûrede Varna kazâsına tâbi‘ Kalata nâm karye ahâlîsinden Malisa v. Todori ve Petro v. Kiryakoz ve Kosta v. Mavridi ve Todori v. Yani ve Dimitri v. Yani ve Mavridi v. İstoyo ve Nikola v. Petro nâm zimmîler muvâcehelerinde üzerlerine takrîr-i da‘vâ edip bundan akdem zimmiyyûn-ı mezbûrûn ve ahâlî-i karye-i mezbûreden Mihal v. İpsadi ve Paskal v. Dimitri ve Andron v. Aleksi ve İstati v. Kosta ve Dimitri v. Kosta nâm [zimmîler] zimmetlerinden yüz bin fıddî râyic fi’l-vakt akçe istikrâz ve kabz ben dahi ikrâz ve teslîm eyledikden sonra merkūmûndan herbiri evvelâ zimmetine lâzım gelen meblağa emr u kabûlü hâviye kefâlet-i sahîha-i şer‘iyye ile kefîl dahi olmuşlar idi hâlâ meblağ-ı mezbûru asâlet ve kefâletleri hasebiyle mezbûrûn zimmîlerden taleb ederin suâl olunsun dedikde gıbbe’s-suâl zimmiyyûn-ı merkūmûn cevâblarında fi’l-hakīka biz ve gāibûn-ı mezbûrûn müdde‘î-i merkūm Ahmed Ağa’dan vech-i muharrer üzere yüz bin akçe istikrâz ve kabz edip herbirimiz âharın zimmetine lâzım gelen meblağa kefîl dahi olmuşduk hâlâ meblağ-ı mezbûr asâleten ve kefâleten müdde‘î-i mezbûr Ahmed Ağa’ya zimmetimizde lâzimü’l-edâ ve vâcibü’l-kazâ deynimiz deyu ikrâr ve i‘tirâf eylediklerin mûcibiyle edâsına zimmiyyûn-ı merkūmûna tenbîh birle mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelâhıre sene [10]68 Şühûdü’l-hâl: eş-Şeyh Hüseyin Efendi Hürremzâde, Mahmud Çelebi b. Süleyman, Hasan Çavuş el-mübâşir, Süleyman Çelebi b. Rıdvan, Ahmed Bey b. Rıdvan, Mustafa Bey el-bevvâb, Kābil Bey el-cündi.