Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 624 Hüküm no: 658 Orijinal metin no: [100b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Mustafa’nın Rus asıllı cariyesi Şehbaz’ı Gevher bt. Abdullah’a altı bin akçeye sattığı Mahmiye-i Edirne’de Hasan Paşa mahallesinde sâkin olup bundan akdem tarîk-ı ticâretde vefât eden Ali Çelebi b. Musa’nın li-üm kız karındaşı ve hasran vârisesi olan Sâliha bt. Mustafa nâm hâtun tarafından husûs-ı âti’l-beyâna vekîl olup hasm-ı münkir-i şer‘î mahzarında Mustafa Bey b. Mehmed ve Zülfikar Beşe b. Abdullah şehâdetleriyle şer‘an vekâleti sâbite olan Ahmed Çelebi b. Abdullah mahmiye-i mezbûrede meclis-i şer‘-i hatîrde müteveffâ-yı mezbûrun zevce-i menkûhası olup ba‘de vefâtihî şeref-i İslâm ile müşerrefe olan Gevher bt. Abdullah mahzarında bi’l-vekâle ikrâr ve takrîr-i kelâm edip müteveffâ-yı mezbûrun ile’l-vefât mülkü olup ba‘de vefâtihî irsen mezbûre Sâliha’ya intikāl eden işbu açık kaşlı elâ gözlü uzun boylu Rusiyyetü’l-asl Şehbaz bt. Abdullah nâm câriye-i memlûke-i mevrûsesini vekâletim hasebiyle mezbûre Gevher’e bâtten altı bin akçeye bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûr altı bin akçeyi mezbûre Gevher’in zevci müteveffâ-yı mezbûr zimmetinde mütekarrir ve ma‘kūdun-aleyh olan altı bin akçe mehr-i müeccele takās edip ol dahi vech-i muharrer üzere mukāssa ve kabûl eyledi hâlâ câriye-i mevsûfe-i mezbûre-i merkūme Gevher’in mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: İbrahim Efendi el-kādî, İsmail Efendi b. ( ), Mustafa Çelebi b. Mehmed, es-Seyyid Mehmed elebi b. Ali, İbrahim Bey b. ( ).