Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 625 Hüküm no: 660 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Emrullah Çelebi b. Mustafa’nın yeniçerilerin 63. oda solakları taamiyesi para vakfına olan borcunun terekesinden ödenmesi Dergâh-ı âlî yeniçerilerinin altmış üçüncü oda solakları ta‘âmiyyeleri’çün mevkūfe nukūda bi’l-fi‘il mütevellî olan işbu bâ‘isü’l-kitâb İbrahim Çelebi b. Kasım nâm yesârî mahmiye-i Edirne’de mahfil-i kazâda zikrolunan odada düzenbaşı olmağla zikri âtî müteveffanın muhallefâtına vâzı‘u’l-yed olmağla me’mûr olan Ahmed Çelebi b. Hüseyin el-yesârî mahzarında bi’t-tevliye üzerine takrîr-i da‘vâ edip oda-i mezbûre ahâlîsinden olup bundan akdem vefât eden Emrullah Çelebi b. Mustafa nâm yesârî zimmetinde mütevellîsi olduğum nukūd-ı mevkūfeden yetmiş beş guruş-ı riyâlî ve üzerine ilzâm-ı ribh olunmuş murâbaha-i müctemi‘asından dahi on bir guruş ve bir rub‘ guruş olup ve zimmetinde olduğunu hayâtında bi’d-defe‘ât ikrâr dahi eyleyip kable’l-îfâ vefât etmeğin tevliyetim hasebiyle meblağ-ı mezbûr ve murâbaha-i mesfûreyi muhallefâtına vâzı‘u’l-yed olan mezbûr Ahmed Çelebi’den vakıf için taleb ederin dedikde gıbbe’s-suâl mezbûr Ahmed Çelebi cevâbında fi’l-vâki‘ me’mûr olduğum cihetden muhallefât-ı mezbûreye vâzı‘u’l-yed olduğunu ikrâr lâkin deyn-i mezkûru inkâr etmeğin mütevellî-i mezbûrdan müdde‘âsını mübeyyine beyyine taleb olundukda udûl-i ricâlden Mustafa Çelebi b. Resul el-yesârî ve Hasan Bey b. Mehmed el-yesârî ve Mustafa Beşe b. Abdülkerim nâm kimesneler li-ecli’ş-şehâde meclis-i şer‘a hâzırûn olup gıbbe’l-istişhâd fi’l-vâki‘ nukūd-ı mevkūfe-i mezbûreden müteveffâ-yı mezbûr Emrullah Çelebi zimmetinde yetmiş beş kıt‘a riyâlî guruş ve üzerine ilzâm-ı ribh olunmuş bir sene murâbahasından dahi on bir guruş ve bir rub‘ guruş deyni olduğunu huzûrumuzda bi’d-defe‘ât ikrâr ve i‘tirâf eyledi biz bu husûsa şâhidleriz şehâdet dahi deriz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olup mûcibiyle ba‘de’l-hükm mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: es-Sâbıkūn.