Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 626 Hüküm no: 661 Orijinal metin no: [101a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. [Merhum Emrullah Çelebi b. Mustafa’nın] hayatta iken yeniçerilerin 63. oda solaklarının taamiyeleri için terekesinden yüz elli guruş verilmesini vasiyet ettiği Dergâh-ı âlî yeniçerilerinin altmış üçüncü oda solaklarının ta‘âmiyyeleri mesâlihi’çün mevkūfe nukūda bi’l-fi‘il mütevellî olan İbrahim Çelebi b. Kasım nâm yesârî mahfil-i kazâda zikrolunan odada düzenbaşı olmağla zikri âtî müteveffanın muhallefâtına vâzı‘u’l-yed olmağa me’mûr olan Ahmed Çelebi b. Hüseyin mahzarında üzerine bi’t-tevliye takrîr-i da‘vâ edip müteveffâ-yı mezbûr mevtinden on gün mukaddam cemâ‘at-i mezbûrenin ta‘âmiyyeleri için sülüs malından yüz elli kıt‘a riyâlî guruş verile deyu vasiyet ve musırran alâ ikrârihî vefât edip sülüs malında müsâ‘ade dahi olmağın hâlâ tevliyetim hasebiyle meblağ-ı mezbûru terekesinden vâzı‘u’l-yed olan mezbûr Ahmed Çelebi’den taleb ederin suâl olunsun dedikde gıbbe’s-suâl mezbûr Ahmed Çelebi cevâbında müteveffâ-yı mezbûrun terekesine vaz‘-ı yed eylediğini ikrâr lâkin vech-i muharrer üzere vasiyet-i merkūmesini inkâr edicek mütevellî-i mezbûrdan müdde‘âsını mübeyyine beyyine taleb olundukda udûl-i ricâlden Mustafa Beşe b. Resul ve Hüseyin Bey b. Mehmed ve Mustafa Beşe b. Abdülkerim nâm yesârî li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müteveffâ-yı mezbûr târih-i merkūmda cemâ‘at-i mezbûrenin ta‘âmiyyesi için sülüs malından yüz elli riyâlî guruş verile deyu bizim huzûrumuzda vasiyet edip ikrâr-ı mezbûru üzerine musırran vefât eyledi bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcibiyle ba‘de’l-hükm mâ-vaka‘a bi’t-taleb ketb olundu. Şühûdü’l-hâl: es-Sâbıkūn.