Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 626 Hüküm no: 662 Orijinal metin no: [101a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Mehmed Ağa b. Abdülkerim’in Kütahya’daki mülk evini ve fırın yerini Yusuf Ağa b. Abdi’ye sekiz bin akçeye sattığı Mahmiye-i İstanbul’da Mi‘mâr Sinan mahallesinde sâkin Dergâh-ı âlî kapıcıbaşılarından iftihârü’l-emâcid ve’l-ekârim câmi‘u’l-mehâmid ve’l-mekârim Sipâhî Mehmed Ağa b. Abdülkerim mahmiye-i Edirne’de meclis-i şer‘-i hatîr-i lâzimü’t-tevkīrde fahrü’l-emsâl râfi‘ü’l-kitâb Yusuf Ağa b. Abdi el-cündi mahzarında bi’t-tav‘ ve’r-rızâ ikrâr ve i‘tirâf edip silk-i mülkümde münselik olup Vilâyet-i Anadolu’da medîne-i Kütahya’da Selvi mahallesinde vâki‘ bir tarafdan Topçu Ebûbekir Bey b. Behran mülkü ve iki tarafdan Saçlıoğlu Hasan Ağ mülkü ve bir tarafdan tarîk-ı âm ile mahdûd Muslı Çavuş nâm kimesneden iştirâ eylediğim hâriciye ve dâhiliyesi fevkānî dört bâb odaları ve bir ahırı ve bahçeyi ve kenîfi müştemil mülk menzilimi ve menzil-i mezbûra muttasıl Ahmed nâm kimesneden iştirâ eylediğim tahmînen bir dönüm fırın yerini cemî‘ tevâbi‘ ve levâhıkı ve kâffe-i hukūk ve merâfıkı ile mezbûr Yusuf Ağa’ya sekiz bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûru yedinden bi’t-tamâm alıp kabz edip mebî‘-i mezbûru mahallinde zabt u tasarrufa mezbûr Yusuf Ağa’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-târihi’l-mezbûr. Şühûdü’l-hâl: Abdi Çavuş b. ( ), Hâcı Hüseyin Bey b. Behram, İbrahim Bey b. Ömer, İsa el-muhzır, İvaz Ağa muhzırbaşı.