Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 627 Hüküm no: 663 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Ağa b. Mehmed’in merhum Manisalı Mustafa Ağa’nın varislerine kılıç bedelinden yüz seksen guruş ve ayrıca doksan bin akçe borcu olduğunu ikrar ettiği Mahmiye-i İstanbul’da Darbhâne kurbünde Sekbânbaşı Ya‘kub Ağa mahallesi sükkânından olup Haremeyn-i Şerîfeyn muhâsebecisi iken bundan akdem vefât eden Manisalı Mustafa Ağa b. Piyale Çavuş’un verâseti vâlidesi Çeşmisiyah bt. Abdülmennân nâm hâtun ile sulbî kebîr oğulları Ahmed Ağa ve Mahmud Ağa ve Abdürrahim Ağa’ya ve sulbiye sagīre kızı Âişe’ye münhasıra olduğu şer‘an müte‘ayyin oldukdan sonra merkūm Ahmed Ağa kendi kıbelinden asâleten ve merkūme Çeşmisiyah ile merkūm Abdürrahim Ağa taraflarından zikri âtî husûmete vekîl olup vekâleti şer‘an sâbite olmağın vekâleten ve sagīre-i mezbûrenin tesviye-i umûruna savb-ı şer‘den mansûb vasî olmağla vesâyeten ve merkūm Mahmud Ağa asâleten mahmiye-i Edirne’de meclis-i şer‘-i şerîfde mahmiye-i İstanbul’da Cerrâh Mehmed Paşa Câmi‘i kurbünde sâkin el-Hâc Ahmed Ağa b. Mehmed mahzarında herbiri takrîr-i da‘vâ edip merkūm el-Hâc Ahmed Ağa mûrisimiz müteveffâ-yı mezbûrdan hâl-i hayâtında bin altmış beş senesi Zilhiccesi evâsıtında bir altın kılıcını yüz seksen riyâlî guruşa iştirâ ve kabz edip kable edâ’i’s-semen mûrisim mezbûr fevt olup meblağ-ı mezbûr irs-i şer‘le bize intikāl ettiğinden mâ‘adâ mûrisimiz müteveffâ-yı mezbûrun terekesinden olup irs-i şer‘le cümlemize intikāl eden mâl-ı gayr-ı maksûmdan bizim yedimizden bin altmış yedi Cumâdelâhıresi’nin on beşinci günü elli bin akçe ve mâh-ı mezbûrun yirmi altıncı günü kırk bin akçe cem‘an doksan bin râyic fi’l-vakt akçe iktirâz ve kabz edip masârıfına sarf ve istihlâk ile meblağ-ı mezbûr zimmetinde deyn olmağın hâlâ semen-i mezkûr yüz seksen guruş ile meblağ-ı mezbûr doksan bin akçe hakkımızın mezbûr Ahmed Ağa’dan alıverilmesin taleb ederiz suâl olunsun deyu zikrolunan tarih ile müverraha ve mezbûr Ahmed Ağa’nın hatemiyle mahtûme ve mu‘anvene mazmûnu takrîrlerini müş‘ire tezkire ibrâz eylediklerinde ba‘de’n-nazar ve’l-kırâe merkūm el-Hâc Ahmed Ağa’dan suâl olundukda cevâbında fi’l-hakīka müteveffâ-yı mezbûrdan târih-i mezkûrda bir altın kılıç yüz seksen riyâlî guruşa iştirâ ve kabz edip meblağ-ı mezbûr zimmetinde deyn olduğundan mâ‘adâ mâh-ı mezkûrda bir def‘ elli bin akçe ve bir def‘a kırk bin akçe cem‘an doksan bin akçeyi müdde‘iyyûn-ı mezbûrûndan iktirâz ve kabz edip masârıfına sarf ve istihlâkle meblağ-ı mezbûr hâlâ zimmetinde deyn olduğuna tav‘an ikrâr ve i‘tirâf edicek i‘tirâfı mûcebince zikrolunan yüz seksen riyâlî guruş ile doksan bin akçeyi müdde‘iyyûn-ı mezbûrûna edâ ile merkūm el-Hâc Ahmed Ağa üzerine muvâcehesinde ilzâm olunur mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Saferi’l-hayr li-sene semân ve sittîn ve elf. Şühûdü’l-hâl: Mehmed Ağa b. Ahmed Çavuş, Manisalı Ahmed Ağa b. Ali, Mustafa Çelebi b. Hasan Efendi, Hamza Çavuş b. Süleyman, Karabaşzâde Ahmed Ağa, Edirneli es-Seyyid Mehmed Ağa, el-Hâc Receb Bey b. Osman.