Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 628 Hüküm no: 664 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Manisalı Mustafa Ağa’nın alacağına kefaletinden dolayı Hacı Ahmed Ağa b. Mehmed’in merhumun varislerine üç yüz kırk beş akçe borcu olduğunu ikrar ettiği Mahmiye-i İstanbul’da Darbhâne kurbünde Sekbânbaşı Ya‘kub Ağa mahallesinde sâkin olup Haremeyn-i Şerîfeyn muhâsebecisi iken bundan akdem vefât eden Manisalı Mustafa Ağa’nın verâseti vâlidesi Çeşmisiyah bt. Abdülmennân ile sulbî kebîr oğulları Ahmed Ağa ve Mahmud Ağa ve Abdürrahim Ağa’ya ve sulbiye sagīre kızı Âişe’ye münhasıra olduğu şer‘an müte‘ayyin oldukdan sonra merkūm Ahmed Ağa kendi tarafından asâleten ve mezbûre Çeşmisiyah tarafından husûmet-i atiyetü’l-beyâna vekîl olup vekâleti şer‘an sâbite olmağla vekâleten ve sagīre-i mezbûrenin vasîsi olmağla vesâyeten ve merkūm Mahmud Ağa kendi kıbelinden asâleten ve karındaşı mezbûr Abdürrahim Ağa tarafından kezâlik vekîl-i sâbitü’l-vekâle olmağın vekâleten mahmiye-i Edirne’de meclis-i şer‘-i hatîrde mahmiye-i İstanbul’da Cerrâh Mehmed Paşa Câmi‘i kurbünde sâkin el-Hâc Ahmed Ağa b. Mehmed mahzarında üzerine herbiri takrîr-i da‘vâ edip mûrisimiz müteveffâ-yı mezbûrun medîne-i Manisa sükkânından gāib ani’l-meclis Hasan Ağazâde Mustafa Ağa’nın oğlu Mustafa Bey zimmetinde cihet-i deyn-i şer‘îden üç yük kırk beş bin akçe hakkı olup meblağ-ı mezbûru kable’l-istîfâ mûrisimiz mezbûr Mustafa Ağa vefât etmekle irs-i şer‘le bize intikāl ettikden sonra mezbûr el-Hâc Ahmed Ağa meblağ-ı mezbûra tarafeynden emr ve kabûlü hâviye kefâlet-i sahîha-i şer‘iyye ile kefîl olmağın bi-hükmi’l-kefâleti’l-meşrûha meblağ-ı mezbûru merkūm el-Hâc Ahmed Ağa’dan taleb ederiz suâl olunsun deyu bin altmış yedi senesi Cumâdelâhıresi’nin yirmi altıncı günü tarihiyle müverraha ve mezbûr Ahmed Ağa’nın hatemiyle mahtûm ve mu‘anven ve meblağ-ı mezbûr üç yük kırk beş bin akçeye kefâletini müş‘ir tezkire ibrâz eylediklerinde ba‘de’l-feth ve’l-kırâe mezbûr el-Hâc Ahmed Ağa’dan istintâk olundukda cevâbında fi’l-hakīka müteveffâ-yı merkūmun gāib-i mezbûr zimmetinde cihet-i deyn-i şer‘îden üç yük kırk beş bin akçe hakkı olup kable’l-istîfâ vefât etmeğin meblağ-ı mezbûr verese-i merkūmûna intikāl ettikden sonra meblağ-ı mezbûra merkūm el-Hâc Ahmed Ağa tarafeynden emr ve kabûlü hâviye kefâlet-i sahîha-i şer‘iyye ile kefîl olduğuna tav‘an ikrâr ve i‘tirâf edicek i‘tirâfı mûcebince meblağ-ı mezbûr üç yük kırk beş bin akçeyi bi-hükmi’l-kefâle verese-i müteveffâ-yı mezbûra edâ ile merkūm el-Hâc Ahmed Ağa üzerine muvâcehesinde ilzâm olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Saferi’l-hayr li-sene semân ve sittîn ve elf. Şühûdü’l-hâl: es-Sâbıkūn.