Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 629 Hüküm no: 666 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Âbide bt. Seyyid Mehmed’in kız kardeşi merhume Hadice’nin terekesiyle ilgili yeğeni Abdullah b. Ahmed Efendi aleyhine açtığı davada haksız olduğunun anlaşıldığı Mahmiye-i Edirne’de Mahmud Ağa mahallesinde sâkine Şerife Âbide bt. es-Seyyid Mehmed nâm hâtun mahmiye-i mezbûrede mahfil-i kazâda mahalle-i mezbûrede sâkin iken bundan akdem vefât eden Ahmed Efendi b. Mustafa’nın sulbî oğlu Abdullah nâm sagīrin tesviye-i umûruna kıbel-i şer‘den mansûb vasî olan ceddi işbu râfi‘ü’l-kitâb el-Hâc İsmail b. Bayram mahzarında üzerine takrîr-i da‘vâ edip müteveffâ-yı mezbûrun zevcesi olup târih-i kitâbdan beş sene mukaddem kendiden esbak vefât eden li-eb kız karındaşım Şerife Hadice nâm hâtunun muhallefât-ı mevcûdesinden hisse-i şer‘iyyem mukābilesinde zevci müteveffâ-yı mezbûr yedinden beynimizde ma‘lûm altı bin akçe kıymetli eşyâ alıp kabz eylemişidim lâkin muhallefât-ı mezbûreden olup zevci mezbûr Ahmed Efendi yedinde on iki ayaklı bir altın saçbağı ve iki çift altın küpe ve bir altın hatem müteveffâ-yı mezbûr Ahmed Efendi yedinde kalmağın hâlâ zikrolunan eşyâdan dahi hisse-i şer‘iyyemi muhallefât-ı müteveffât-ı mezbûreye vâzı‘u’l-yed olan vasiyy-i merkūmdan taleb ederin suâl olunsun dedikde gıbbe’s-suâl vasiyy-i merkūm cevâbında müdde‘iye-i mezbûrenin taleb eylediği saçbağı ve küpe ve hatemi inkâr eylediğinden mâ‘adâ müdde‘iye-i mezbûre târih-i merkūmda müteveffât-ı merkūme Şerife Hadice’nin cemî‘ muhallefâtından hisse-i şer‘iyyesi mukābilesinde zevci müteveffâ-yı mezbûr Ahmed Efendi yedinden kabzına i‘tirâf eylediği altı bin akçe kıymetli eşyâ-i ma‘lûmeyi bî-tarîkı’s-sulh alıp kabz eyledikden sonra muhallefât-ı müteveffâ-yı mezbûreye müte‘allik cem‘-i de‘âvî ve mutâlebâtdan mezbûr Ahmed Efendi’nin zimmetini hayâtında ibrâ-i âmm-ı kātı‘u’n-nizâ‘la ibrâ ve ıskāt eylemişidi deyu def‘le mukābile edicek gıbbe’l-istintâk ve akībe’l-inkâr vasiyy-i merkūmdan def‘-i mezkûrunu mübeyyine beyyine taleb olundukda udûl-i Müslimînden olup mahmiye-i mezbûrede Sarıca Paşa mahallesi sükkânından Hasan Çelebi b. Hüseyin ve el-Hâc Ca‘fer b. Hâcı Mehmed ve el-Hâc Mahmud b. Hüseyin nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘iye-i mezbûre Şerife Âbide Hâtun târih-i merkūmda kız karındaşı müteveffât-ı merkūmenin cemî‘ muhallefâtından kendiye âid olan hisse-i şer‘iyyesi mukābilesinde müteveffâ-yı mezbûr Ahmed Efendi yedinden bi-tarîkı’s-sulh altı bin akçe kıymetli eşyâ-ı ma‘lûmeyi bizim huzûrumuzda alıp kabz eyledikden sonra muhallefât-ı müteveffâ-yı mezbûreye müte‘allik cemî‘ de‘âvî ve mutâlebâtdan zevci müteveffâ-yı mezbûr Ahmed Efendi’nin zimmetini hayâtında ibrâ-i âmm-ı kātı‘u’n-nizâ‘la ibrâ ve ıskāt eyledi biz bu husûsa bu vech üzere şâhidleriz şehâdet dahi ederiz deyu edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın müdde‘iye-i mezbûre Şerife Âbide Hâtun mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min şehri Cumâdelâhıre li’s-seneti’l-mezbûre. Şühûdü’l-hâl: El-hâc Mustafa Çelebi b. Ahmed el-yesârî, Mehmed Beşe b. Ali el-yesârî, Hâcı Muharrem b. Bayram, Ali Bey b. Abdullah, İbrahim Bey b. Ömer, İsa b. Ahmed.