Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 635 Hüküm no: 672 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ereğli kasabasından Aleksandra v. Yorgi, Panayot v. Yani, Aleksi v. Dimo ve Hıristo v. Niko’nun Mahmud Ağa b. Derviş’e yirmi dört bin akçe borçları olduğunu ikrar ettikleri Havâss-ı aliyye muzâfâtından Ereğli kasabası sükkânından olup kasab tâifesinden Aleksandra v. Yorgi ve Panayot v. Yani ve Aleksi v. Dimo nâm zimmîler mahmiye-i Edirne’de meclis-i şer‘-i hatîrde işbu bâ‘isü’l-kitâb umdetü’l-emâcid ve’l-mekârim (ekârim) câmi‘u’l-mehâmid ve’l-mekârim Mahmud Ağa b. Derviş tarafından ikrâr-ı âtîyi tasdîka vekîl olup nehc-i şer‘î üzere vekâleti sâbite olan Siyavuş Bey b. Abdullah mahzarında herbiri ikrâr ve takrîr-i kelâm edip biz üçümüz ve kasaba-i mezbûre sâkinlerinden olup şerîkimiz olan gāib ani’l-meclis Hıristo v. Niko nâm zimmî müvekkil-i mezbûr Mahmud Ağa’dan sermaye tarîkiyle yirmi bin akçe istikrâz ve kabz edip ve kasaba-i mezbûrede vâki‘ etrâf-ı erba‘ası tarîk-ı âm ile mahdûd bir bâb kasab dükkânı dahi târih-i kitâb senesinde vâki‘ rûz-ı Hızır’dan bir sene tamâmına değin bize ve şerîkimiz gāib-i mezbûra dört bin beş yüz akçeye îcâr ve teslîm biz dahi istîcâr ve kabûl eyleyip cihet-i karzdan yirmi bin akçe ve icâre-i mezkûreden müeccel-i merkūme cem‘an yirmi dört bin fıddî râyic fi’l-vakt akçe ve zimmetimizde lâzimü’l-edâ ve vâcibü’l-kazâ deynimiz olup cemî‘ meblağ-ı mezbûrdan her birimiz âharın zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelâhıre sene [10]68. Şühûdü’l-hâl: Hasan Bey b. ( ) el-cündi, Hüseyin Bey b. Hasan, Muslı Beşe b. ( ), Ahmed b. Ali, Mustafa b. ( ), İbrahim Bey el-cündi, Hâcı Hüseyin el-cündi.